Lakkundi Gold Treasure: బయటపడ్డ 600 ఏళ్ల నాటి ఆభరణాలు-విలువెంతో తెలుసా..?

కర్ణాటకలోని గదగ్ జిల్లా లక్కుండిలో లభించిన నిధి విలువ సుమారు ₹8 కోట్లు ఉంటుందని రాష్ట్ర ప్రభుత్వం వెల్లడించింది. ఇంటి నిర్మాణానికి పునాది తవ్వుతుండగా ప్రజ్వుల్ రిత్తి కుటుంబానికి ఈ బంగారు నిధి దొరికింది. వారు వెనుకాడకుండా నిధి మొత్తాన్ని ప్రభుత్వానికి అప్పగించి నిజాయితీని చాటుకున్నారు. ఈ పరిణామం అందరినీ ఆశ్చర్యపరిచింది.

లక్కుండి హెరిటేజ్ ఏరియా డెవలప్‌మెంట్ అథారిటీ రాష్ట్ర స్థాయి కమిటీ సమావేశం అనంతరం పర్యాటక శాఖ మంత్రి హెచ్.కె.పాటిల్ ఈ వివరాలను వెల్లడించారు. నిధిలో మొత్తం 664 గ్రాముల అరుదైన, పురాతన బంగారు ఆభరణాలు లభించాయి. ఈ ఆభరణాలు 600 ఏళ్ల నాటి చారిత్రక ప్రాధాన్యత కలిగిన పురాతన వస్తువులు కావడంతో అంతర్జాతీయ మార్కెట్లో వీటికి భారీ విలువ ఉంటుందని ఆయన పేర్కొన్నారు.

ఈ ప్రాంతంలో లభించిన బంగారం విలువను శాస్త్రీయంగా నిర్ధారించేందుకు పురావస్తు శాఖ నిపుణులతో ఒక ప్రత్యేక కమిటీని ఏర్పాటు చేసింది. జిల్లా కలెక్టర్ అధ్యక్షతన ఏర్పడిన ఈ కమిటీలో ప్రముఖ చరిత్రకారులు, నిపుణులు పాల్గొన్నారు. ఆభరణాల చారిత్రక నేపథ్యాన్ని పరిశీలించి నివేదిక సమర్పించారని మంత్రి హెచ్.కె.పాటిల్ వెల్లడించారు.

గత ఏడాది కాలంలో గదగ్ జిల్లా లక్కుండిలో దాదాపు మూడు వేల పురావస్తు అవశేషాలను సేకరించారు. లక్కుండిలోని పదహారు దేవాలయాలను రక్షిత కట్టడాలుగా ప్రకటించారు. ఇవి చాళుక్య, హోయసల, విజయనగర శైలిల ప్రాచీన ఆలయాల శిల్పకళా నైపుణ్యాన్ని ప్రదర్శిస్తాయి. వేల సంవత్సరాల క్రితమే ఇది అభివృద్ధి చెందిన ముఖ్య నగరంగా విలసిల్లింది.

లక్కుండి గ్రామంలో 50కి పైగా ప్రాచీన దేవాలయాలు, బావులు ఉన్నాయి. చాళుక్యులు, కళాచూరీలు, దేవగిరి యాదవులు, సేవణులు, హోయసలుల పాలనా కాలం నాటి అనేక శాసనాలు ఇక్కడ లభించాయని మంత్రి హెచ్.కె.పాటిల్ వెల్లడించారు.

కర్ణాటకలోని గదగ్ జిల్లాలో ఇప్పటికే 600 ఏళ్లనాటి బంగారు ఆభరణాలు లభ్యం కావడంతో, త్వరలోనే విస్తృత తవ్వకాలకు శ్రీకారం చుట్టనున్నారు. లక్కుండిలో ఇప్పటివరకు 32 దేవాలయాలు, 36 బావులను గుర్తించారు. మరో 68 గుడులు, 64 బావుల తవ్వకాలు జరపాల్సి ఉంది.

ఈ తవ్వకాల పనులను ఈ ఏడాది డిసెంబర్ చివరికల్లా పూర్తి చేయాలని లక్ష్యంగా పెట్టుకున్నారు. లక్కుండిని ప్రపంచ వారసత్వ ప్రదేశాల జాబితాలో చేర్చడానికి యునెస్కోకు ప్రతిపాదన పంపనున్నామని హెచ్.కె.పాటిల్ ఈ సందర్భంగా తెలిపారు.

English summary

కర్ణాటకలోని గదగ్ జిల్లా లక్కుండిలో ఇంటి పునాదుల కోసం తవ్వుతుండగా సుమారు ₹8 కోట్ల విలువైన పురాతన బంగారు నిధి లభించింది. దాదాపు 600 ఏళ్ల చరిత్ర కలిగిన ఈ 664 గ్రాముల ఆభరణాలను ప్రజ్వుల్ రిత్తి కుటుంబం ప్రభుత్వానికి అప్పగించింది. ఈ ప్రాంత చరిత్రను వెలికి తీసేందుకు తవ్వకాలు చేపట్టి, లక్కుండిని యునెస్కో వారసత్వ జాబితాలో చేర్చాలని ప్రభుత్వం నిర్ణయించింది.