చౌక బియ్యం ఎన్టీఆర్ దే: బాబు

విజయవాడ: ఎన్టీఆర్ ఆశయాల మేరకు ఫలితాలు పేదలకు అందడం లేదని తెలుగుదేశం పార్టీ అధ్యక్షుడు నారా చంద్రబాబునాయుడు అన్నారు. కృష్ణా జిల్లా జగ్గయ్యపేటలో బుధవారం ఏర్పాటైన స్వర్గీయ ఎన్టీరామారావు జయంతి సభలో ఆయన ప్రసంగించారు. రెండు రూపాయలకు కిలో బియ్యం పథకం ఎన్టీ రామారావు ప్రవేశపెట్టిందేనని ఆయన చెప్పారు. ఇప్పుడు కాంగ్రెసు చెప్పుకుంటున్న పథకాలన్నీ ఎన్టీ రామారావు ప్రవేశపెట్టినవేనని ఆయన అన్నారు. రైతుల రుణాలు పూర్తిగా మాఫీ అయ్యే వరకు పోరాడుతామని ఆయన చెప్పారు. స్వామినాధన్ కమిటి సిఫార్సులను ఆమోదించాలని ఆయన కేంద్ర ప్రభుత్వాన్ని డిమాండ్ చేశారు. రైతుల వెంట తాము ఉంటామని ఆయన హామీ ఇచ్చారు.

పేదరికాన్ని పూర్తిగా నిర్మూలించడం సాధ్యమవుతుందని ఆయన అన్నారు. తాను మరో 12 రోజులు రాష్ట్రంలో తిరిగి పేదల సమస్యలను, అన్ని వర్గాలను ప్రజలను అర్థం చేసుకుంటానని ఆయన చెప్పారు. ప్రజలను ఏ విధంగా ఆదుకోవాలో అధ్యయనం చేస్తామని ఆయన చెప్పారు. మీ కోసం యాత్ర ద్వారా దేశ రాజకీయాలను పూర్తిగా మార్చి వేస్తామని ఆయన చెప్పారు. నిత్యావసర సరుకుల ధరలు విపరీతంగా పెరిగాయని ఆయన అన్నారు. ప్రజల ఆదాయం పెరిగి, ఖర్చులు తగ్గేలా తాము విధానాలను రూపొందించుకుంటామని ఆయన చెప్పారు. ధరలు తగ్గించలేని ప్రభుత్వం ప్రజలను ఇబ్బందులు పెడుతోందని ఆయన అన్నారు. తమ 9 పాలనలో ధరలు పెరగలేదని ఆయన చెప్పారు. గ్యాస్ ధర పెరిగిందని, బ్లాక్ మార్కెట్లో అమ్ముతున్నారని, గ్యాస్ ఉచితంగా ఇస్తామని, పేదల గృహ వినియోగానికి ఉచితంగా కరెంట్ ఇస్తామని ఆయన చెప్పారు.

పేదలందరికీ ఉచితంగా ఇళ్లు కట్టిస్తామని, బాకీలు మాఫీ చేయిస్తామని ఆయన చెప్పారు. రైతులకు నాణ్యమైన కరెంటును 12 గంటల పాటు పగటి పూటే ఉచితంగా ఇస్తామని ఆయన చెప్పారు. చదువుకున్న యువకులందరికీ వేయి రూపాయలేసి నిరుద్యోగ భృతి ఇప్పిస్తామని ఆయన చెప్పారు. చదువుకున్న ప్రతి ఒక్కరికీ ఉపాధి కల్పిస్తామని ఆయన చెప్పారు. చంద్రబాబు ఈ సభలో హామీల వర్షం కురిపించారు. ఐదు శాతం రిజర్వేషన్లు కల్పిస్తామని కాంగ్రెసు ప్రభుత్వం ముస్లింలను మోసం చేసిందని ఆయన విమర్శించారు. వాకిరి రిజర్వేషన్లు కల్పించే బాధ్యత తీసుకుంటామని ఆయన చెప్పారు.