ఎన్నికల్లో పోటీపై చెప్పలేను: బాలకృష్ణ

హైదరాబాద్: వచ్చే ఎన్నికల్లో పోటీ చేసే విషయమై ఇప్పుడే ఏమీ చెప్పలేనని తెలుగు సినీ హీరో బాలకృష్ణ అన్నారు. తెలుగుదేశం పార్టీకి తన సేవలు ఎప్పుడూ ఉంటాయని ఆయన చెప్పారు. జూనియర్ ఎన్టీఆర్, కళ్యాణ్ రామ్, తదితర కుటుంబ సభ్యులతో కలిసి ఆయన బుధవారం తన తండ్రి స్వర్గీయ ఎన్టీ రామారావుకు నివాళులర్పించారు. ఎన్టీఆర్ జయంతి సందర్భంగా ఎన్టీఆర్ ఘాట్ వద్ద నివాళులర్పించారు. బసవ తారకం ఆస్పత్రిలో వారు రక్తదాన శిబిరం నిర్వహించారు. ఈ సందర్భంగా బాలకృష్ణ మీడియా ప్రతినిధులతో చెప్పారు.

నాన్నగారి స్ఫూర్తితో ఇక నుంచి సేవా కార్యక్రమాలను ఉధృతం చేస్తామని ఆయన చెప్పారు. సందేశాత్మక చిత్రాల నిర్మాణానికి ప్రాధాన్యం ఇస్తానని ఆయన చెప్పారు. సాధ్యమైనంత వరకు ప్రజల కోసం సేవా కార్యక్రమాలు చేస్తామని ఆయన చెప్పారు. తాత ఎన్టీఆర్ స్ఫూర్తితో బాబాయ్ బాలకృష్ణ అడుగుజాడల్లో నడుచుకుంటానని జూనియర్ ఎన్టీఆర్ చెప్పారు. తాత ఎన్టీఆర్ కు నివాళులర్పించడానికి వచ్చిన ఎన్టీఆర్ ఘాట్ దేవాలయంలా ఉందని కళ్యాణ్ రామ్ అన్నారు.