మాకు పోటీ తెరాసతోనే: డిఎస్

హైదరాబాద్: ఉప ఎన్నికల్లో పోటీ తమకూ, తెలంగాణ రాష్ట్ర సమితి (తెరాస)కి మధ్యనే పోటీ ఉంటుందని ప్రదేశ్ కాంగ్రెస్ కమిటీ (పిసిసి) అధ్యక్షుడు డి. శ్రీనివాస్ అభిప్రాయపడ్డారు. ఈ ఉప ఎన్నికల్లో తాము మంచి ఫలితాలు సాధిస్తామని ఆయన బుధవారం మీడియా ప్రతినిధుల సమావేశంలో ధీమా వ్యక్తం చేశారు. ఈ ఎన్నికలకు తెలంగాణ వాదంతో సంబంధం లేదని ఆయన అన్నారు.

తెలంగాణ వాదం విషయంలో తెరాస ప్రజలను మభ్యపెడుతోందని ఆయన విమర్శించారు. ఈ ఎన్నికల ఫలితాల తర్వాత తీవ్ర పరిణామాలుంటాయని ఎందుకు ప్రచారం జరుగుతోందో అర్థం కావడం లేదని ఆయన అన్నారు. తెలంగాణవాదాన్ని తాము ఈ ఎన్నికల కోసం బలి పెట్టడానికి సిద్ధంగా లేమని ఆయన అన్నారు.