ఆర్మూర్ ఘటన దురదృష్టకరం: రఘువీరా

హైదరాబాద్: నిజామాబాద్ జిల్లా ఆర్మూరు సంఘటన దురదృష్ణకరమని వ్యవసాయ శాఖా మంత్రి ఎన్. రఘువీరా రెడ్డి అన్నారు. ఏం జరిగిందో కూడా తమకు సరిగా తెలియదని ఆయన సోమవారం మీడియా ప్రతినిధులతో అన్నారు. వ్యాపారంలో పోటీ వల్ల రైతులను రెచ్చగొట్టారని ఆయన అభిప్రాయపడ్డారు. రైతులను మోసం చేసినవారిపై చర్యలు తీసుకుంటామని ఆయన చెప్పారు.

నిజామాబాద్ జిల్లా ఆర్మూరు రైతులు ప్రత్యేకమైన ఎర్రజొన్న విత్తనాలు పండించి హర్యానా, పంజాబ్ రాష్ట్రాలకు అమ్ముతారని, వీటిని కొందరు వ్యాపారులు రైతుల నుంచి కొనుగోలు చేసి అమ్ముతారని ఆయన చెప్పారు. ఈ వ్యాపారుల మధ్య పోటీ పెరిగిందని ఆయన చెప్పారు. ఈ సమస్యపై ముఖ్యమంత్రి డాక్టర్ వైయస్ రాజశేఖర రెడ్డి ఇటీవల సమావేశం ఏర్పాటు చేసి, విత్తనాలను సీడ్ కార్పోరేషన్ కొనుగోలు చేయాలని నిర్ణయించామని ఆయన చెప్పారు.