ఎమ్మెస్ వియ్యంకుల ఆత్మహత్యా యత్నం

తాడేపల్లిగూడెం: ప్రముఖ హాస్యనటుడు ఎమ్మెస్ నారాయణ వియ్యంకుడు బల్లేటి నర్సయ్య, వియ్యంకురాలు లక్ష్మి ఆత్మహత్యా యత్నానికి పాల్పడ్డారు. పురుగుల మందు తాగి వారు ఆత్మహత్యా యత్నానికి పాల్పడ్డారు. ఎమ్మెస్ తమను మానసికంగా వేధిస్తున్నారని ఆరోపిస్తూ మనస్తాపం చెంది వారు ఈ ఘాతుకానికి పాల్పడినట్లు సమాచారం. వారు ప్రస్తుతం తాడేపల్లిగూడెం ఆస్పత్రిలో చికిత్స పొందుతున్నారు. తమ కొడుకు దుర్గాప్రసాద్ పై తప్పుడు కేసు పెట్టి జైలుపాలు చేశారని వారు ఆవేదన చెందుతున్నారు.

తన భర్త దుర్గాప్రసాద్ తనను గత కొంత కాలంగా అదనపు కట్నం కోసం వేధిస్తున్నాడని, పైగా ఒక జూనియర్ ఆర్టిస్టుతో వైవాహికేతర సంబంధం పెట్టుకున్నాడని ఆరోపిస్తూ ఎమ్మెస్ కూతురు శశికిరణ్ హైదరాబాదులోని సంజీవరెడ్డినగర్ పోలీసులకు ఫిర్యాదు చేసింది. దీంతో పోలీసులు దుర్గాప్రసాద్ ను అరెస్టు చేశారు. తమ కుమారుడిపై అక్రమ కేసు బనాయించారని దుర్గాప్రసాద్ కుటుంబం ఆరోపిస్తోంది. దుర్గాప్రసాద్ తల్లి స్వయానా ఎమ్మెస్ నారాయణ చెల్లెలు కావడం విశేషం.