శరద్ పవార్ తో వైయస్ భేటీ

న్యూఢిల్లీ: ముఖ్యమంత్రి డాక్టర్ వైయస్ రాజశేఖర రెడ్డి బుధవారం ఢిల్లీలో కేంద్ర వ్యవసాయ శాఖ మంత్రి శరద్ పవార్ ను కలిశారు. వరికి క్వింటాలుకు వేయి రూపాయల మద్దతు ధర ప్రకటించే విషయమై ఆయన శరద్ పవార్ తో చర్చించారు. అదే విధంగా రాష్ట్రానికి ఇచ్చే సబ్సిడీ బియ్యంపై కూడా ఆయన మాట్లాడారు. రెండు రోజుల పర్యటన నిమిత్తం ఆయన బుధవారం ఢిల్లీకి చేరుకున్నారు.

కాగా, మాదిగ రిజర్వేషన్ పోరాట సమితి నాయకుడు మందకృష్ణ మాదిగ బుధవారం ఢిల్లీలో ముఖ్యమంత్రిని కలిశారు. ఎస్సీ రిజర్వేషన్ల వర్గీకరణకు చట్టబద్దత కల్పించేందుకు కేంద్ర ప్రభుత్వంపై ఒత్తిడి తేవాలని, ఈ విషయమై ప్రధాని మన్మోహన్ సింగ్ తోనూ, యుపిఎ చైర్ పర్సన్ సోనియాతోనూ మాట్లాడాలని కోరినట్లు కృష్ణ తెలిపారు. వర్గీకరణపై ఆర్డినెన్స్ తెచ్చేలా చూస్తానని ముఖ్యమంత్రి హామీ ఇచ్చినట్లు ఆయన తెలిపారు.