ఇది అతి పెద్ద నష్టం: జానారెడ్డి

విశాఖపట్నం: గ్రేహౌండ్స్ పోలీసులపై మావోయిస్టుల దాడి దారుణమని రాష్ట్ర హోం మంత్రి కె. జానారెడ్డి అన్నారు. ఆస్పత్రిలో చికిత్స పొందుతున్న పోలీసులను ఆయన సోమవారం పరామర్శించారు. సమాచార లోపం వల్ల అడవిలో ఎందరున్నారు, ఎందరు బయటపడ్డారు అనే విషయం తెలియడం లేదని ఆయన చెప్పారు.

గ్రేహౌండ్స్ చరిత్రలోనే ఇది అతి పెద్ద నష్టమని ఆయన అన్నారు. గాలింపు కోసం నేవీ, ఆర్మీ, ఒఎన్ జిసి హెలికాప్టర్లను వినియోగిస్తున్నట్లు ఆయన తెలిపారు. తిరిగి వస్తున్న పోలీసులపై మావోయిస్టులు దాడి చేయడం సరైంది కాదని ఆయన అన్నారు. బాధితులను విశాఖ సెవెన్ హిల్స్ ఆస్పత్రిలో జానారెడ్డి పరామర్శించారు. సంఘటన జరిగిన తీరును ఆయన అడిగి తెలుసుకున్నారు. చికిత్స పొందుతున్న పోలీసులు కోలుకుంటున్నారు.