ప్రభుత్వానిది మొండిపట్టు: చంద్రబాబు

తాడేపల్లిగూడెం: అణు ఒప్పందంపై యుపిఎ ప్రభుత్వం మొండి పట్టు పడుతోందని తెలుగుదేశం పార్టీ అధ్యక్షుడు నారా చంద్రబాబునాయుడు విమర్శించారు. ప్రభుత్వ మొండివైఖరి వల్లనే కేంద్రంలో అనిశ్చిత పరిస్థితి నెలకొన్నదని ఆయన అన్నారు. పశ్సిమ గోదావరి జిల్లాలో మీ కోసం యాత్ర చేస్తున్న చంద్రబాబు బుధవారం మీడియా ప్రతినిధులతో మాట్లాడారు. ప్రధాని మన్మోహన్ సింగ్ చేతగాని రాజకీయాలు చేస్తున్నారని ఆయన విమర్శించారు.

కాంగ్రెస్ విధానాలు అప్రజాస్వామికంగా ఉన్నాయని ఆయన వ్యాఖ్యానించారు. ధరల పెరుగుదల వంటి ప్రజాసమస్యలను ప్రభుత్వం పట్టించుకోకుండా ప్రభుత్వం అణు ఒప్పందానికి ప్రాధాన్యం ఇస్తోందని ఆయన అన్నారు. విశ్వాస తీర్మానంలో ప్రభుత్వం నెగ్గుతుందో లేదో చెప్పలేమని ఆయన అన్నారు. జాతీయ స్థాయిలో తృతీయ ప్రత్యామ్నాయాన్ని బోలపేతం చేస్తామని, ఇందుకు ఇతర పార్టీలతో, వామపక్షాలతో మాట్లాడుతున్నామని ఆయన చెప్పారు.