విద్యుత్తు కోత తప్పదు: రోశయ్య

విజయవాడ: మరి కొన్నాళ్లు విద్యుత్ కోత తప్పదని రాష్ట్ర ఆర్థిక మంత్రి కె. రోశయ్య అన్నారు. విద్యుత్తుకు సంబంధించి ఇబ్బందులు లేవని గానీ అంతా సక్రమంగానే ఉందని గానీ తాను బుకాయించదలుచుకోలేదని ఆయన శుక్రవారం మీడియా ప్రతినిధులతో అన్నారు. కొంత కాలం ప్రజలు ఈ ఇబ్బందిని భరించక తప్పదని, పరిస్థితిని గమనించాలని ఆయన అన్నారు.

రాష్ట్రంలోని జలాశయాల్లో నీటి మట్టాలు తగ్గి విద్యుత్ ఉత్పత్తి తగ్గిందని, దాంతో ఇబ్బందులు ఎదరువుతున్నాయని ఆయన అన్నారు. రోజుకు 10 కోట్ల రూపాయలతో విద్యుత్తును కొనుగోలు చేసి వ్యవసాయానికి ఉచిత విద్యుత్తును అందిస్తున్నా సరిపోవడం లేదని ఆయన అన్నారు.