22న మన్మోహన్ బలపరీక్ష

న్యూఢిల్లీ: ఈ నెల 22వ తేదీన బలపరీక్షకు సిద్ధపడాలని ఐక్య ప్రగతిశీల కూటమి (యుపిఎ) భాగస్వామ్య పక్షాలు నిర్ణయించుకున్నాయి. ఇందుకుగాను ఈ నెల 21, 22 తేదీల్లో ప్రత్యేక పార్లమెంటు సమావేశాలు ఏర్పాటు చేయాలని యుపిఎ అభిప్రాయపడింది. అయితే ఈ నెల 18వ తేదీననే బలపరీక్షకు ప్రభుత్వం సిద్ధపడే అవకాశాలు ఉన్నట్లు కూడా వార్తలు వస్తున్నాయి. ఈ తేదీని ఖరారు చేయడానికి రక్షణ మంత్రి ప్రణబ్ ముఖర్జీ అధ్యక్షతన రాజకీయ వ్యవహారాల మంత్రి వర్గ కమిటీ సమావేశమైంది.

శుక్రవారం రాత్రి 9 గంటలకు జరిగే కాంగ్రెస్ వర్కింగ్ కమిటీ (సిడబ్ల్యుసి సమావేశంలో పార్లమెంటులో ప్రభుత్వం బలపరీక్షకు సిద్ధపడే తేదీపై తుది నిర్ణయం తీసుకుంటారు. విశ్వాస తీర్మానం నెగ్గడానికి తమకు తగిన బలం ఉందని యుపిఎ భాగస్వామ్య పక్షాలు అభిప్రాయపడ్డాయి. యుపిఎ సమావేశానికి పిడిపి, జెఎంఎంలు కూడా హాజరై అనుమానాలను తీర్చాయి. కాగా, సమాజ్ వాదీ పార్టీ నాయకులు ములాయం సింగ్ యాదవ్, అమర్ సింగ్ శుక్రవారంనాడు ప్రధాని డాక్టర్ మన్మోహన్ సింగ్ ను కలిశారు.