బలపరీక్షలో నెగ్గుతాం: సోనియా

న్యూఢిల్లీ: తాము విశ్వాస పరీక్షకు సిద్ధంగా ఉన్నామని, బలపరీక్షలో యుపిఎ నెగ్గుతుందని యుపిఎ చైర్ పర్సన్, కాంగ్రెస్ అధ్యక్షురాలు సోనియా గాంధీ అన్నారు. యుపిఎకు మద్దతు ఇవ్వడానికి ముందుకు వచ్చిన సమాజ్ వాదీ పార్టీ (ఎస్పీ)ని స్వాగతిస్తున్నామని, ఎస్పీకి కృతజ్ఞతలు తెలుపుతున్నామని ఆమె అన్నారు. యుపిఎ భాగస్వామ్యపక్షాల సమావేశంలో ఆమె శుక్రవారం పాల్గొన్నారు. విశ్వాస పరీక్ష కోసం సాధ్యమైనంత త్వరలో లోకసభ ప్రత్యేక సమావేశం జరుగుతుందని ఆమె చెప్పారు.

పార్లమెంటు ఆమోదం పొందకుండా అణు ఒప్పందం అమలులోకి రాదని వామపక్షాలు మద్దతు ఉపసంహరించుకోవడానికి ముందు ప్రధాని మన్మోహన్ సింగ్ చెప్పారని, దానికి తాము కట్టుబడి ఉన్నామని ఆమె చెప్పారు. నాలుగేళ్ల పాటు వామపక్షాలకు తమకు కీలకమైన మద్దతిచ్చాయని, వామపక్షాలు లేకుంటే యుపిఎ ఏర్పడి ఉండేది కాదని ఆమె అన్నారు. యుపిఎ భాగస్వామ్య పక్షాలన్నీ పాల్గొన్నాయి.