జలయజ్ఞం దేశద్రోహం: చంద్రబాబు

హైదరాబాద్: జలయజ్ఞం పేరుతో ముఖ్యమంత్రి డాక్టర్ వైయస్ రాజశేఖర రెడ్డి ప్రభుత్వం దేశద్రోహానికి పాల్పడుతోందని తెలుగుదేశం పార్టీ అధ్యక్షడు నారా చంద్రబాబునాయుడు వ్యాఖ్యానించారు. ఆయన మీకోసం యాత్ర బుధవారంనాడు నల్లగొండ జిల్లాలో కొనసాగింది. రాజశేఖర రెడ్డి ప్రభుత్వం సాగునీటి ప్రాజెక్టుల విషయంలో తీవ్ర అవినీతికి పాల్పడుతోందని ఆయన మీడియా ప్రతినిధుల సమావేశంలో విమర్శించారు. జిల్లాలకు జిల్లాలను వైయస్ అమ్మేసుకుంటోందని ఆయన వ్యాఖ్యానించారు. వైయస్ నియంతలా వ్యవహరిస్తున్నారని ఆయన అన్నారు.

ప్రతిపక్షాల నేతలపై, కార్యకర్తలపై అక్రమ కేసులు బనాయిస్తున్నారని ఆయన విమర్శించారు. నాలుగేళ్ల కాంగ్రెసు పాలనలో స్థానిక సంస్థలు నిర్వీర్యమైపోయాయని, స్థానిక సంస్థల ప్రజాప్రతినిధులు ఉత్సవ విగ్రహాలుగా మిగిలిపోయారని ఆయన అన్నారు. ప్రభుత్వం విశ్వవిద్యాలయ భూములను కూడా అమ్ముకుంటోందని ఆయన అన్నారు. సంపద పెరిగినప్పుడు తద్వారా వచ్చే ఆదాయాన్ని ప్రజా సంక్షేమానికి మళ్లించడం సాధ్యమేనని ఆయన అన్నారు.