22 ప్రభుత్వానికి ఆఖరి రోజు: సురవరం

హైదరాబాద్: ఈ నెల 22వ తేదీ ఐక్యప్రగతిశీల కూటమి (యుపిఎ) ప్రభుత్వానికి ఆఖరి రోజని సిపిఐ సీనియర్ నాయకుడు, పార్లమెంటు సభ్యుడు సురవరం సుధాకర్ రెడ్డి అన్నారు. యుపిఎ ప్రభుత్వం స్పష్టంగా మైనారిటీలో పడిపోయిందని, 2 నుంచి 5 ఓట్లతో తేడాతో ప్రభుత్వం విశ్వాస తీర్మానాన్ని ఓడిపోవడం ఖాయమని ఆయన బుధవారం మీడియా ప్రతినిధుల సమావేశంలో అన్నారు. పార్లమెంటులో చర్చ అనంతరం ప్రధాని డాక్టర్ మన్మోహన్ సింగ్ రాజీనామా చేయడం మంచిదని ఆయన అభిప్రాయపడ్డారు.

ప్రభుత్వానికి వ్యతిరేకంగా తెలంగాణ రాష్ట్ర సమితి (తెరాస)తో పాటు అన్ని లౌకిక పార్టీలను కూడగడుతున్నట్లు ఆయన తెలిపారు. అణు ఒప్పందంపై ప్రధాని మన్మోహన్ సింగ్ ప్రభుత్వాన్ని ఆత్మహత్యకు పురిగొల్పుతున్నారని ఆయన వ్యాఖ్యానించారు. ప్రభుత్వాన్ని కాపాడుకోవడానికి కాంగ్రెస్ బేరసారాలకు దిగడం హేయమైన చర్య అని ఆయన అన్నారు. తెరాస యుపిఎకు వ్యతిరేకంగా ఓటు చేయాలని నిర్ణయించుకోవడం ఆహ్వానించదగ్గ పరిణామమని ఆయన అన్నారు. కాంగ్రెస్, ప్రధాని ప్రతిష్టను దెబ్బ తీసే బేరసారాలను యుపిఎ మానుకోవాలని ఆయన సూచించారు.