మాకు 280కి పైగా సభ్యుల మద్దతు: రవి

న్యూఢిల్లీ: ఐక్య ప్రగతిశీల కూటమి (యుపిఎ)కి 280 మందికి పైగా సభ్యుల మద్దతు ఉందని కాంగ్రెసు అంటోంది. ఈ నెల 22వ తేదీన మన్మోహన్ సింగ్ ప్రభుత్వం పార్లమెంటులో బలపరీక్షను ఎదుర్కోనున్న నేపథ్యంలో కాంగ్రెస్ అధ్యక్షురాలు సోనియా గాంధీ బుధవారం పార్టీ సీనియర్ నాయకులు, కేంద్ర మంత్రులతో సమావేశమయ్యారు. మంత్రులు ప్రణబ్ ముఖర్జీ, శివరాజ్ పాటిల్, పృథ్వీరాజ్ చౌహాన్, వాయలార్ రవి తదితరులు ఈ సమావేశానికి హాజరయ్యారు. తమకు 280కి పైగా సభ్యుల మద్దతు ఉందని, ప్రభుత్వం బలపరీక్షలో సులభంగా విజయం సాధిస్తుందని వాయలార్ రవి అన్నారు. ప్రభుత్వ విశ్వాస తీర్మానం నెగ్గడానికి 272 మంది సభ్యుల మద్దతు అవసరం.

ప్రభుత్వం బలపరీక్షలో ఓడిపోతుందని బిజెపి నాయకుడు వి.కె. మల్హోత్రా మంగళవారంనాడు అన్నారు. లోకసభలో యుపిఎకు 250కి మించి సభ్యుల బలం లేదని ఆయన మంగళవారంనాడు అన్నారు. కొన్ని చిన్న పార్టీల నాయకులతో పాటు కాంగ్రెసులోని కొంతమంది ఎంపిలు కూడా తమతో మాట్లాడుతున్నారని ఆయన చెప్పారు. తమను సంప్రదిస్తున్నవారి పేర్లను ఆయన వెల్లడించలేదు.