అణు ఒప్పందాన్ని ఆపాలి: మాయ

న్యూఢిల్లీ: అమెరికాతో అణు ఒప్పందాన్ని ప్రతిష్టాత్మకంగా తీసుకోవద్దని బహుజన సమాజ్ (బిఎస్పీ) నేత మాయావతి ప్రధాని డాక్టర్ మన్మోహన్ సింగ్ కు సూచించారు. అణు ఒప్పందంపై ఐక్యప్రగతిశీల కూటమి (యుపిఎ) ప్రభుత్వం తదుపరి చర్యలను నిలిపేయాలని, తుది రూపు ఇచ్చేందుకు దాన్ని తదుపరి ప్రభుత్వానికి వదిలేయాలని ఆమె సోమవారం మీడియా ప్రతినిధుల సమావేశంలో సూచించారు.

అమెరికాకు భారత్ ను బానిసగా చేయడానికే ఈ అణు ఒప్పందం పనికి వస్తుందని, తన ప్రయోజనాలను రక్షించుకుని దేశం తలెత్తుకుని నిలబడాల్సిన అవసరం ఉందని ఆమె అన్నారు. ప్రభుత్వం, ప్రధాని అణు ఒప్పందాన్ని ప్రతిష్టాత్మకంగా తీసుకోవద్దని, ఈ ఒప్పందాన్ని కొంత కాలం నిలిపేయాలని, ఎన్నికలు దగ్గరలోనే ఉన్నాయని, దాన్ని ఎన్నికల తర్వాత అధికారంలోకి వచ్చే ప్రభుత్వానికి వదిలేయడం మంచిదని ఆమె అన్నారు. ఈ అణు ఒప్పందం 7.4 బిలియన్ డాలర్ల ఇరాన్ - పాకిస్తాన్ - భారత్ ల గ్యాస్ పైప్ లైన్ ప్రాజెక్టుకు విఘాతం కలిగిస్తుందని, అమెరికా టెహ్రాన్ పట్ల ప్రమాదకర పద్ధతిలో వ్యవహరిస్తోందని ఆమె అన్నారు.