ఓటింగుకు మమతా బెనర్జీ దూరం

న్యూఢిల్లీ: విశ్వాస పరీక్షకు దూరంగా ఉండాలని తృణమూల్ కాంగ్రెస్ పార్లమెంటు సభ్యురాలు మమతా బెనర్జీ నిర్ణయించుకున్నారు. కోల్ కత్తాలో సోమవారం జరిగిన ఒక ర్యాలీలో ప్రసంగిస్తూ ఆమె ఈ విషయం చెప్పారు. తాను వామపక్షాలు, బిజెపిలతో కలిసి ఓటు చేయలేనని, అలాగే కాంగ్రెసును సమర్థించలేనని ఆమె అన్నారు.

అణు ఒప్పందానికి వెళ్లే ముందు కాంగ్రెస్ ప్రజల తీర్పు కోరాల్సి ఉండిందని ఆమె అన్నారు. అణు ఒప్పందంపై ప్రధాని మన్మోహన్ సింగ్ కు అంత ఇష్టం వుంటే ప్రజల ఆమోదం తీసుకుని ఉండాల్సిందని, అందుకు ఎన్నికలను ఎంచుకోవాల్సిందని ఆమె అన్నారు. ప్రజా ప్రయోజనాల కోసం తాను రేపు జరిగే ఓటింగుకు దూరంగా ఉండదలుచుకున్నట్లు ఆమె తెలిపారు. బెంగాల్ ప్రభుత్వం ప్రజా వ్యతిరేక విధానాలను అనుసరిస్తోందని ఆమె విమర్శించారు. నిత్యావసర ధరలు పెరుగుతుంటే ప్రభుత్వం వాటిని అదుపు చేయడానికి బదులు అణు ఒప్పందం వివాదాన్ని ముందుకు తెచ్చిందని ఆమె వ్యాఖ్యానించారు.