ఆదేశాల బేఖాతరు: సమావేశ నిర్వహణ

న్యూఢిల్లీ: లోకసభ స్పీకర్ పదవికి రాజీనామా చేయాలనే సిపిఎం నాయకత్వ ఆదేశాలను ధిక్కరిస్తూ సోమనాధ్ చటర్జీ సోమవారం అఖిల పక్ష సమావేశానికి అధ్యక్షత వహించారు. ప్రభుత్వ విశ్వాస పరీక్ష కోసం ఏర్పాటైన ప్రత్యేక సమావేశానికి ముందు ఈ సమావేశం జరిగింది. ప్రధాని డాక్టర్ మన్మోహన్ సింగ్ ప్రతిపాదించే విశ్వాస తీర్మానంపై చర్చించేందుకు ఆయన ఫ్లోర్ లీడర్ల సమావేశం ఏర్పాటు చేశారు. అణు ఒప్పందంపై వామపక్షాలు ప్రభుత్వానికి మద్దతు ఉపసంహరించుకున్న నేపథ్యంలో మన్మోహన్ సింగ్ విశ్వాస తీర్మానాన్ని ప్రతిపాదించాల్సిన పరిస్థితి ఏర్పడింది.

స్వీకర్ గా కొనసాగుతారా అని విలేకరులు వేసిన ప్రశ్నకు సోమనాధ్ చటర్జీ జవాబు ఇవ్వలేదు. ఈ సమావేశానికి ఎన్సీపి నేత శరద్ పవార్, లోకజనశక్తి నాయకుడు రాం విలాస్ పాశ్వాన్, బిజెపి నాయకుడు వి.కె. మల్హోత్రా, సిపిఎం నాయకుడు బసుదేవ్ ఆచార్య, రాష్ట్రీయ లోక దళ్ నాయకుడు అజిత్ సింగ్ తదితరులు హాజరయ్యారు. స్పీకర్ పదవికి రాజీనామా చేయాలని ఆదివారం రాత్రి కూడా సిపిఎం నాయకత్వం సోమనాధ్ కు సూచించింది. అయితే అటువంటి సమాచారమేదీ సోమనాధ్ ఛటర్జీ చూడలేదని ఆయన సన్నిహిత వర్గాలు చెప్పాయి.