టిడిపి నుంచి మందా జగన్నాథం వెలి

న్యూఢిల్లీ: విశ్వాస పరీక్షలో యుపిఎకు అనుకూలంగా ఓటు చేసిన తమ పార్టీ పార్లమెంటు సభ్యుడు మందా జగన్నాథాన్ని పార్టీ నుంచి బహిష్కరించినట్లు తెలుగుదేశం పార్టీ అధ్యక్షుడు నారా చంద్రబాబునాయుడు చెప్పారు. ఆదికేశవులు నాయుడు యుపిఎకు వ్యతిరేకంగా ఓటు వేశాడా, లేదా అనే విషయాన్ని పరిశీలిస్తున్నామని, యుపిఎకు అనుకూలంగా ఓటు వేసినట్లు తేలితే ఆదికేశవులు నాయుడిపై చర్యలు తీసుకుంటామని ఆయన బుధవారం మీడియా ప్రతినిధుల సమావేశంలో చెప్పారు. ఆదికేశవులునాయుడుకు షోకాజ్ నోటీసు జారీ చేశామని ఆయన చెప్పారు.

మందా జగన్నాథం డబ్బులకో, ఇతర ప్రలోభాలకో లొంగిపోయి ఉంటారని ఆయన అన్నారు. పార్టీ విధానాలకు ప్రతి ఒక్కరు కట్టుబడి ఉండాలని ఆయన అన్నారు. కాంగ్రెసు పార్లమెంటు సభ్యులను కొనుగోలు చేసిందని ఆయన విమర్శించారు. కాంగ్రెసు కేంద్రంలో అధికారంలోకి వచ్చిన ప్రతిసారీ ఇటువంటి దారుణ రాజకీయాలనే అనుసరిస్తోందని ఆయన అన్నారు. డబ్బులు ఇవ్వకుండా ఎవరు కూడా యుపిఎకు అనుకూలంగా ఓటు చేయలేదని ఆయన అన్నారు.