మాయావతితోనే చంద్రులు

న్యూఢిల్లీ: బహుజన సమాజ్ పార్టీ (బిఎస్పీ) నేత మాయావతితోనే జాతీయ స్థాయిలో కలిసి పని చేయాలని తెలుగుదేశం పార్టీ అధ్యక్షుడు నారా చంద్రబాబునాయుడు, తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖరరావు నిర్ణయించుకున్నారు. యుపిఎ, బిజెపిలకు ప్రత్యామ్నాయాన్ని ఏర్పాటు చేయాలనుకున్న పార్టీలు బుధవారం ఇక్కడ సమావేశమయ్యాలి. వామపక్షాలు, బిఎస్పీ, యుఎన్ పియె నాయకులు భవిష్యత్తు కార్యక్రమాన్ని నిర్ణయించుకోవడానికి మాయావతి నివాసంలో సమావేశమయ్యారు.

ఈ సమావేశంలో ప్రకాష్ కారత్ (సిపిఎం), ఎ.బి. బర్దన్, డి రాజా (సిపిఐ), హెచ్.డి. దేవెగౌడ (జెడిఎస్), జి. దేవరాజన్ (ఫార్వర్డ్ బ్లాక్), అబానీ రాయ్ (ఆర్ఎస్పీ), అజిత్ సింగ్ (ఆర్ఎల్డీ), నారా చంద్రబాబునాయుడు (టిడిపి), కె. చంద్రశేఖరరావు (తెరాస), అజయ్ చౌతాలా (ఐఎన్ఎల్డీ), బాబూలాల్ మారండీ (జార్ఖండ్ వికాస్ మోర్చా) పాల్గొన్నారు. మాయావతితో కలిసి పని చేయడం ద్వారా తమ పార్టీని పటిష్టం చేస్తామని సమావేశానికి ముందే కర్ణాటకకు బయలుదేరిన జెడిఎస్ నేత కుమారస్వామి అన్నారు. కర్ణాటకలో తృతీయ ప్రత్యామ్నాయాన్ని బలోపేతం చేస్తామని ఆయన చెప్పారు. బిఎస్పీతో తాము కలిసి పనిచేస్తామని తెరాస అధ్యక్షుడు కెసిఆర్ అన్నారు. మాయావతితో పాటు ఆయన మీడియాకు దర్శనమిచ్చారు. తాము కలిసి పనిచేస్తామని హైదరాబాదుకు బయలుదేరుతూ ఆయన చెప్పారు.