చిరంజీవి అరచేతిలో స్వర్గం: డిఎస్

హైదరాబాద్: మెగాస్టార్ చిరంజీవి ప్రజలకు అరచేతిలో స్వర్గం చూపడం సరి కాదని ప్రదేశ్ కాంగ్రెస్ కమిటీ (పిసిసి) అధ్యక్షుడు డి. శ్రీనివాస్ అన్నారు. విధివిధానాలను ప్రకటించే వరకు స్పందించబోనని అంటూనే ఆయన మంగళవారంనాడు మీడియా ప్రతినిధుల సమావేశంలో చిరంజీవిపై కొన్ని వ్యాఖ్యలు చేశారు. రాష్ట్రంలో ప్రజలు ప్రస్తుతం ఆనందంగా ఉన్నారని, రాష్ట్రాన్ని సంతోషాంధ్రప్రదేశ్ గా మార్చడానికి చిరంజీవి కష్టపడాల్సిన అవసరం ఏమీ లేదని ఆయన అన్నారు.

ఒకాయన స్వర్ణాంధ్రప్రదేశ్ అంటారు, మరొకాయన సంతోషాంధ్రప్రదేశ్ అంటున్నారని ఆయన తెలుగుదేశం పార్టీ అధ్యక్షుడు నారా చంద్రబాబునాయుడు, చిరంజీవిలను ఉద్దేశించి అన్నారు. తమ పార్టీపై చేగొండి హరిరామజోగయ్య చేసిన వ్యాఖ్యలపై తాను మాట్లాడదలుచుకోలేదని ఆయన అన్నారు. కొంత మంది నాయకులు అభద్రతా భావానికి గురై పార్టీని వదిలి వెళ్తే తాము చేసేది ఏమీ లేదని ఆయన హరిరామజోగయ్యను ఉద్దేశించి అన్నారు. హరిరామజోగయ్య కాంగ్రెస్ పార్టీకి రాజీనామా చేసి చిరంజీవి పార్టీలో చేరిన విషయం తెలిసిందే.