టిడిపి, తెరాసలకు పొత్తు నష్టం: ఎమ్మెస్సార్

హైదరాబాద్: పొత్తు పెట్టుకుంటే తెలుగుదేశం, తెలంగాణ రాష్ట్ర సమితి (తెరాస) రెండు పార్టీలూ నష్టపోతాయని కాంగ్రెస్ సీనియర్ శాసనసభ్యుడు ఎం. సత్యనారాయణరావు అన్నారు. ఇప్పటి వరకు సమైక్యవాదం అన్న తెలుగుదేశం పార్టీని తెలంగాణ ప్రజలు ఎలా నమ్ముతారని ఆయన సోమవారం మీడియా ప్రతినిధులతో అన్నారు. ఈ రెండు పార్టీలు పొత్తు పెట్టుకుంటే కాంగ్రెస్ పార్టీకి నష్టమేమీ లేదని ఆయన అన్నారు.

ఇతర పార్టీలు ఎన్ని నాటకాలు ఆడినా కాంగ్రెస్ పార్టీ గెలుస్తుందని ఆయన ధీమా వ్యక్తం చేశారు. తమ పార్టీ ప్రభుత్వం తిరిగి ఏర్పడుతుందని ఆయన చెప్పారు. తాము తెలంగాణ రాష్ట్రం ఇవ్వబోమని అనడం లేదు కదా అని ఆయన అన్నారు. తెలంగాణ అంశం తమ పార్టీ అధిష్ఠానం వద్ద ఉందని ఆయన చెప్పారు. సోనియా గాంధీ నిర్ణయానికి కట్టుబడి ఉంటామని ముఖ్యమంత్రి డాక్టర్ వైయస్ రాజశేఖర రెడ్డి చెప్పారని, తాము తెలంగాణ రాష్ట్రం ఏర్పాటుకు ఎలాగూ అనుకూలంగా ఉన్నామని ఆయన అన్నారు.