వివాదంలో చార్మి: బిజెపి మండిపాటు

హైదరాబాద్: టాలీవుడ్ ముద్దుగుమ్మ చార్మి తాజాగా ఓ వివాదంలో చిక్కుకుంది. చెప్పులు వేసుకుని వినాయకుడి మండపంలోకి అడుగుపెట్టిన చార్మిపై భారతీయ జనతా పార్టీ (బిజెపి) నాయకులు మండిపడుతున్నారు. హైదరాబాదులోని ఖైరతాబాద్ లో గల వినాయకుడి మండపంలోకి చార్మి చెప్పులతో ప్రవేశించారు. దీన్ని గమనించిన బిజెపి నాయకులు ఆమెపై మండిపడుతున్నారు. చార్మి క్షమాపణలు చెప్పాల్సిందేనని బిజెపి నాయకుడు చింతల రామచంద్రారెడ్డి డిమాండ్ చేశారు.

చార్మి ఇదే వినాయక మండపానికి వచ్చి క్షమాపణ చెప్పాలని ఆయన డిమాండ్ చేశారు. క్షమాపణ చెప్పకపోతే చార్మి షూటింగులను కూడా అడ్డుకుంటామని ఆయన అన్నారు. పొరపాట్లు చేయడం మానవ సహజమని, అయితే ఆ పొరపాట్లను గుర్తెరిగి సరిదిద్దుకోవాల్సి ఉంటుందని ఆయన అన్నారు. ధర్మాన్ని కాపాడాల్సిన వాళ్లే ఈవిధంగా వ్యవహరిస్తే మిగతా వాళ్లు ఏ విధంగా వ్యవహరిస్తారో ఆలోచించాలని ఆయన చార్మికి సూచించారు.