చిరును చూసి కలవరమా?: వైయస్

హైదరాబాద్: ప్రజారాజ్యం పార్టీ అధినేత చిరంజీవిని చూసి తానేమీ కలవరం పడడం లేదని ముఖ్యమంత్రి డాక్టర్ వైయస్ రాజశేఖర రెడ్డి అన్నారు. ఒక ప్రైవేట్ తెలుగు టీవీ చానెల్ నిర్వహించిన కార్యక్రమంలో ఆయన ఆ విధంగా అన్నారు. 'నన్ను చూస్తే నేను కలవరపడినట్లు కనిపిస్తున్నానా, అటువంటి కలవరమేమీ లేదు' అని ఆయన అన్నారు. తమ కాంగ్రెస్ పార్టీ నుంచి ప్రజారాజ్యం పార్టీకీ నాయకులు గానీ , కార్యకర్తలు గానీ వెళ్లడం లేదని, తమ పార్టీ పటిష్టంగా ఉందని ఆయన అన్నారు. కలవరం చెందే చిరంజీవిపై తాను వ్యాఖ్యలు చేస్తున్నట్లు వస్తున్న వ్యాఖ్యల్లో ఏ మాత్రం నిజం లేదని, తాను కలవరం చెందే పరిస్థితులేమీ లేవని ఆయన అన్నారు.

వచ్చే ఎన్నికల్లో ప్రభుత్వ వ్యతిరేక ఓట్లు ప్రజారాజ్యం, తెలుగుదేశం పార్టీలు పంచుకుంటాయని, దాని వల్ల తమకు లాభం చేకూరుతుందని ఆయన అన్నారు. బెదిరించి, బ్లాక్ మెయిల్ చేసి పబ్బం గడుపుకోవడానికే తెలుగుదేశం పార్టీ స్పీకర్ కె.ఆర్. సురేష్ రెడ్డిపై శాసనసభలో అవిశ్వాస తీర్మానం ప్రతిపాదించిందని ఆయన వ్యాఖ్యానించారు.