బాలయ్యకు పురంధరేశ్వరి సలహా

ఏలూరు: తెలుగుదేశం పార్టీ అధ్యక్షుడు నారా చంద్రబాబునాయుడికి మద్దతిచ్చే విషయంలో పునరాలోచన చేసుకోవాలని కేంద్ర మంత్రి, స్వర్గీయ ఎన్టీఆర్ కూతురు దగ్గుబాటి పురంధరేశ్వరి తన సోదరులు బాలకృష్ణకు, హరికృష్ణకు సూచించారు. తమ తండ్రి ఎన్టీఆర్ 1982లో తిరుపతి సభ సందర్భంగా తెలుగుదేశం పార్టీలోకి ఆహ్వానించినప్పుడు మొహానికి రంగు వేసుకున్నవారికి ఓట్లు వస్తాయా, ఎన్టీఆర్ కు ఐదు శాతం ఓట్లు కూడా రావని చంద్రబాబు అన్నట్లు ఆమె గుర్తు చేశారు. తన వారసుడు బాలయ్య అని ఎన్టీఆర్ ప్రకటించినప్పుడు బంధువులను వారసులుగా ఎలా ప్రకటిస్తారని చంద్రబాబు గొడవ చేశారని కూడా ఆమె గుర్తు చేశారు. పశ్చిమ గోదావరి జిల్లా పర్యటనకు వచ్చిన ఆమె మంగళవారం మీడియా ప్రతినిధులతో మాట్లాడారు.

రాజకీయాల్లో బంధుప్రీతి పనికి రాదని చెప్పిన చంద్రబాబుకు ఇప్పుడు తన సోదరుల అవసరం ఎందుకు వచ్చిందని ఆమె ప్రశ్నించారు. ఇప్పుడు తన సోదరులను, ఇతర బంధువులను ఎందుకు చంద్రబాబు అక్కున చేర్చుకుంటున్నారని ఆమె అడిగారు. అటువంటి చంద్రబాబుకు మద్దతిచ్చే ముందు తన సోదరులు బాలయ్య, హరికృష్ణ ఆలోచించుకోవాలని ఆమె సూచించారు.