స్పెషల్ : 'ఫ్యాన్'గాలితో చిరుకు చిరాకు

హైదరాబాద్: చిరంజీవి ప్రజారాజ్యం పార్టీకి అభిమానులే కొండంత అండ కాగా ఆ అభిమానులే శాపంగా పరిణమిస్తున్న సంఘటనలు అక్కడక్కడా జరుగుతున్నాయి. ప్రజారాజ్యం జిల్లా పార్టీ కార్యాలయాలు ప్రారంభించిన కొద్ది గంటల్లోనే అభిమానుల గ్రూపుల్లో నెలకొన్న విభేదాలు బయటపడి ఘర్షణలకు దారి తీశాయి. శుక్రవారం రాత్రి గుంటూరులో పార్టీ దిమ్మ ఆవిష్కరణ సందర్భంగా చిరు అభిమానుల్లోని రెండు వర్గాల మధ్య ఆధిపత్య పోరు జరిగి కాలర్లు పట్టుకోవడం వరకు పరిస్ధితి వెళ్ళింది. వీరి ఘర్షణల ఫలితంగా అక్కడి వీడియో షాపు ధ్వంసమైంది.

శ్రీకాకుళంలోని ప్రజాపార్టీ కార్యాలయం మీద కూడా చిన్నసైజు దాడి జరిగింది. అక్కడ ఉన్న చిరంజీవి అభిమాని ప్రకాష్ ను గుర్తు తెలియని వ్యక్తులు చితకబాదారు. దాడి చేసిన వ్యక్తులు కూడా చిరంజీవి అభిమానులేనని పోలీసులు అనుమానిస్తున్నారు.

చిరంజీవి తన ప్రజాయాత్రల్లో కూడా అభిమానుల నుంచి ఇబ్బందులు ఎదుర్కొంటున్నారు. ఆయన ప్రజలతో గొంతెత్తి, మనసు విప్పి మాట్లాడుదామనుకున్నప్పుడు సందర్భ రహితంగా నినాదాలు చేసి ఆయన సందేశం ప్రజల్లోకి వెళ్ళకుండా అడ్డుకుంటున్నారన్న విమర్శ ఉంది. ఈ విషయంలో చిరంజీవి తన అభిమానులకు ప్రేమతో ఒక సందేశం ఇవ్వడం సముచితంగా ఉంటుందేమో.