నోటుకు ఓటు: అమర్ సింగ్ కు క్లీన్ చిట్

న్యూఢిల్లీ: నోటుకు ఓటు కుంభకోణంలో కిశోర్ చంద్రదేవ్ నేతృత్వంలోని పార్లమెంటరీ కమిటీ సమాజ్ వాదీ పార్టీ నాయకుడు అమర్ సింగ్ కు, కాంగ్రెస్ నాయకుడు అహ్మద్ పటేల్ కు క్లీన్ చిట్ ఇచ్చింది. ప్రధాని మన్మోహన్ సింగ్ ప్రభుత్వ బలపరీక్ష సందర్భంగా ఓట్లు కొనుగోలు చేయడానికి ప్రయత్నించారని చెప్పడానికి తగిన ఆధారాలు లేవని కమిటీ తన నివేదికలో అభిప్రాయపడింది. అయితే ఈ కేసుపై తదుపరి విచారణ అవసరమని అంటూ సిబిఐ దర్యాప్తు జరిపించాలని సిఫార్సు చేసింది. కమిటీ తుది సమావేశం ఈ నెల 17వ తేదీన జరుగుతుంది.

జులై 22వ తేదీన మన్మోహన్ సింగ్ ప్రభుత్వాన్ని బలపరచాలని తమకు లంచం ఇవ్వజూపారని బిజెపి పార్లమెంటు సభ్యులు సభలో ఆరోపించారు. అంతేకాకుండా స్పీకర్ వేదిక వద్ద డబ్బు సంచులు విప్పి చూపించారు. దీనిపై కిశోర్ చంద్రదేవ్ నేతృత్వంలో పార్లమెంటరీ కమిటీ ఏర్పాటైంది. ఆ కమిటీ విచారణ జరిపి నివేదికను సిద్ధం చేసింది.