వరంగల్ నుంచి పోటీ: విజయశాంతి

వరంగల్: ప్రజల కోరిక మేరకు తాను వచ్చే ఎన్నికల్లో వరంగల్ నుంచి పోటీ చేస్తానని తల్లి తెలంగాణ అధ్యక్షురాలు విజయశాంతి చెప్పారు. వరంగల్ లోని ఎంజిఎం అస్పత్రిని ఆమె బుధవారం సందర్శించి రోగులకు పండ్లు పంచి పెట్టారు. తెలంగాణ విషయంలో ముఖ్యమంత్రి డాక్టర్ వైయస్ రాజశేఖర రెడ్డి నియంత పోకడలు ప్రదర్శిస్తున్నారని ఆమె విమర్శించారు.

ఎంజిఎం ఆస్పత్రిలో వైద్య సౌకర్యాలు సరిగా లేవని, వైద్యం కూడా సరిగా అందడం లేదని ఆమె అన్నారు. మందులు కూడా లేవని ఆమె చెప్పారు. ఆరోగ్యశ్రీ పథకం కింద కార్పోరేట్ ఆస్పత్రులకు కోట్లాది రూపాయలు కట్టబెడుతున్న ప్రభుత్వం తెలంగాణలోని ప్రభుత్వాస్పత్రులను పట్టించుకోవడం లేదని ఆమె విమర్శించారు.