హరికృష్ణతో కృష్ణాయాదవ్ భేటీ

హైదరాబాద్: మాజీ మంత్రి సి. కృష్ణయాదవ్ మళ్లీ తెలుగుదేశం వైపు అడుగులు వేస్తున్నారు. నకిలీ స్టాంపుల కుంభకోణంలో ఆరోపణలు వచ్చి అరెస్టు కావడంతో కృష్ణయాదవ్ ను తెలుగుదేశం పార్టీ నాయకత్వం పార్టీ నుంచి బహిష్కరించింది. తెలుగుదేశంలో చేరడానికి ఆయన శుక్రవారం ఉదయం పార్టీ పోలిట్ బ్యూరో సభ్యుడు నందమూరి హరికృష్ణను కలిశారు. తాను పార్టీ అధిష్ఠానవర్గంతో ఈ విషయాన్ని చర్చిస్తానని హరికృష్ణ కృష్ణాయాదవ్ కు హామీ ఇచ్చారు. కృష్ణయాదవ్ సుప్రీంకోర్టు తీర్పు ప్రతిని తెచ్చారని హరికృష్ణ చెప్పారు. పార్టీకి నీతి నిజాయితీ గల నాయకులు కావాలని ఆయన ఆయన అన్నారు. స్వర్గీయ ఎన్టీ రామారావును స్ఫూర్తిని నిలబెట్టేవారు అవసరమని ఆయన అన్నారు.

తాను ఎన్టీ రామారావు స్ఫూర్తితో రాజకీయాల్లోకి వచ్చానని, 2003 వరకు తాను పలు పదవులు కూడా అనుభవించానని కృష్ణయాదవ్ చెప్పారు. జరిగిన విషయాలను తాను హరికృష్ణకు చెప్పానని ఆయన తెలిపారు. వచ్చే ఎన్నికల్లో తాను అంబర్ పేట నియోజకవర్గం నుంచి శాసనసభకు పోటీ చేస్తానని ఆయన చెప్పారు. తమ పార్టీ అధ్యక్షుడు నారా చంద్రబాబునాయుడును ముఖ్యమంత్రిగా చూడాలన్నదే తమ కోరిక అని హరికృష్ణ అన్నారు.