ము'బారక్' ఒబామా, కొత్త శకం

వాషింగ్టన్ : ఇది నా ఒక్కడి విజయం కాదు... ప్రజల విజయం... ప్రజల కలలకు, ఆకాంక్షలకు ప్రతిరూపం.... నామీద మీరు ఉంచిన నమ్మకానికి కృతజ్ఞతలు...అందరం చేయిచేయికలిపి పనిచేద్దాం... దేశ ఆర్థిక వ్యవస్థకు ఎదురైన సవాళ్లను సమర్థంగా ఎదుర్కొందాం... అధ్యక్షుడిగా ఇదే నా మొదటి కార్యక్రమం... అమెరికాకు తొలి నల్లజాతి అధ్యక్షుడిగా ఎన్నికైన డెమొక్రాట్ల అభ్యర్థి బరాక్‌ ఒబామా తొలిపలుకులివి. భారీఎత్తున గుమిగూడిన జనసందోహం ముందుకు భార్య, పిల్లలు, సోదరిలతో కలిసి చిరునవ్వుతో వచ్చిన ఒబామా ఎంతో ఆత్మవిశ్వాసంతో నిబ్బరంతో ప్రసంగించారు.

మొదట కొంత ఉద్వేగానికి లోనైనా తరువాత స్థిరంగా తన అభిప్రాయాన్ని ప్రకటించారు. ప్రపంచవ్యాప్తంగా నెలకొన్న ఆర్ధికసంక్షోభం అమెరికాను కూడా కుదిపివేస్తున్న నేపథ్యంలో అందరం కలిసి దేశభక్తితో దీన్ని ఎదుర్కొందాం...అమెరికా గతంలోకూడా ఎన్నో సవాళ్లను, సంక్షోభాలను అధిగమించింది... దీన్ని కూడా మనం అధిగమిస్తాం... మీ సహకారంతో ముందుకెళతా... ప్రజలకోసం.. ప్రజలచేత... ప్రజలకొరకు నేనుంటా అని ఆయన హామీ ఇచ్చారు.