వైయస్ కు చిరు ఘరానా జవాబు

హైదరాబాద్: ఎవరి ఊరికి ఎవరు ఎంత చేశారో, ఎవరు లబ్ధి పొందారో ముఖ్యమంత్రి డాక్టర్ వైయస్ రాజశేఖర రెడ్డికి తెలుసునని ప్రజారాజ్యం అధినేత చిరంజీవి అన్నారు. ముఖ్యమంత్రి ఈ విషయంలో ఆత్మవిమర్శ చేసుకోవాలని ఆయన అన్నారు. సొంత ఊరికే ఏమీ చేయని చిరంజీవి రాష్ట్రానికి ఏం చేస్తారని ముఖ్యమంత్రి డాక్టర్ వైయస్ రాజశేఖర రెడ్డి చేసిన వ్యాఖ్యపై చిరంజీవి శుక్రవారం మీడియా ప్రతినిధుల సమావేశంలో తీవ్రంగా ప్రతిస్పందించారు. ముఖ్యమంత్రి చేసిన వ్యాఖ్యకు తగిన సమయంలో తగిన స్థలంలో వివరంగా సమాధానం చెప్తానని ఆయన అన్నారు.

తాను మొగల్తూరులో కొద్ది కాలం మాత్రమే ఉన్నానని, తన తండ్రి ఉద్యోగరీత్యా పలు ప్రాంతాలు తిరిగానని, తన బాధ్యత మొగల్తూరుకే పరిమితం కాదని, రాష్ట్రం బాధ్యత తనపై ఉందని ఆయన చెప్పారు. తెలంగాణపై తమ వైఖరి స్పష్టంగానే ఉందని ఆయన చెప్పారు. బిజెపితో సహా ఎవరు అధికారంలోకి వచ్చినా తెలంగాణ రాష్ట్ర ఏర్పాటుకు తాము సహకరిస్తామని ఆయన చెప్పారు. బిజెపి అధినేత ఎల్.కె. అద్వానీ తనకు శుభాకాంక్షలు మాత్రమే చెప్పారని ఆయన స్పష్టం చేశారు. ఎన్డీయేలో చేరుతామా లేదా అనేది ఇప్పుడే చెప్పలేమని ఆయన అన్నారు. బాలల దినోత్సవం సందర్భంగా ప్రజారాజ్యం పార్టీకి వివిధ వేషధారణల్లో పిల్లలు వచ్చి చిరంజీవిని కలిశారు. తాము అధికారంలోకి వస్తే పిల్లలకు తగిన పథకాలు రూపొందిస్తామని ఆయన చెప్పారు.