పిల్లలందరికీ పోషకాహారం: వైయస్

హైదరాబాద్: పిల్లలందరికీ పోషకాహారం లభించేలా చర్యలు తీసుకుంటామని ముఖ్యమంత్రి డాక్టర్ వైయస్ రాజశేఖరరెడ్డి హామీ ఇచ్చారు. తల్లి గర్భంలో ఉన్నప్పుడు, రెండేళ్ల వయస్సు వరకు సరైన పోషకాహారం అందినప్పుడే పిల్లలు మానసికంగా, శారీరకంగా ఎదుగుతారని ఆయన అన్నారు. హైదరాబాదులోని రవీంద్రభారతిలో జరిగిన పిల్లల దినోత్సవ కార్యక్రమంలో ఆయన శుక్రవారం పాల్గొన్నారు. వివిధ రంగాల్లో ప్రతిభ కనబరిచిన పిల్లలకు పురస్కారాలు అందజేశారు. అమెరికా, ఐరోపా దేశాల్లో మన దేశంతో పోలిస్తే పిల్లల మరణాలు తక్కువగా ఉన్నాయని, మనం కూడా ఆ స్థాయికి ఎదగాల్సిన అవసరం ఉందని ఆయన అన్నారు.

అంతకు ముందు ఆయన గుంటూరులో పిల్లల దినోత్సవ కార్యక్రమంలో పాల్గొన్నారు. నెహ్రూ చిత్రపటానికి పూలమాల వేసి శ్రద్ధాంజలి ఘటించారు. హైదరాబాదులోని కాంగ్రెస్ పార్టీ కార్యాలయంలో పిల్లల దినోత్సవ కార్యక్రమం జరిగింది. ఈ కార్యక్రమంలో ప్రదేశ్ కాంగ్రెస్ కమిటీ అధ్యక్షుడు డి. శ్రీనివాస్ తో పాటు ముఖ్యమంత్రి డాక్టర్ వైయస్ రాజశేఖర రెడ్డి పాల్గొన్నారు. నెహ్రూ జయంతి సందర్బంగా రాష్ట్రవ్యాప్తంగా శుక్రవారం పిల్లల దినోత్సవ కార్యక్రమం జరిగింది.