వైయస్ ధనయజ్ఞం సక్సెస్: బాబు

హైదరాబాద్: ముఖ్యమంత్రి డాక్టర్ వైయస్ రాజశేఖర రెడ్డి జలయజ్ఞం విఫమైందని, ధనయజ్ఞం మాత్రం సక్సెస్ అయిందని తెలుగుదేశం పార్టీ అధ్యక్షుడు నారా చంద్రబాబునాయుడు వ్యాఖ్యానించారు. ముఖ్యమంత్రి డాక్టర్ వైయస్ రాజశేఖర రెడ్డి ప్రభుత్వంపై ఆయన బుధవారం మీడియా ప్రతినిధుల సమావేశంలో తీవ్రంగా ధ్వజమెత్తారు. ముఖ్యమంత్రి డాక్టర్ వైయస్ రాజశేఖర రెడ్డి డబ్బులు దోచుకుంటున్నారని ఆయన ఆరోపించారు. కమీషన్ల కోసమే ప్రాణహిత - చేవెళ్ల ప్రాజెక్టును చేపడుతున్నారని ఆయన అన్నారు. ముఖ్యమంత్రికి ప్రాజెక్టుల కట్టే దమ్ము లేదని, డబ్బులు దోచుకునే దమ్ము మాత్రం ఉందని ఆయన అన్నారు.

మహారాష్ట్ర ప్రభుత్వం గోదావరి నదిపై నిర్మిస్తున్న బాబ్లీతో పాటు 11 ప్రాజెక్టులను అపించడంలో ముఖ్యమంత్రి విఫలమయ్యారని, కాంట్రాక్టర్లతో కుమ్మక్కయి ప్రాజెక్టులను ఆపించడం లేదని ఆయన విమర్శించారు. గోదావరినదిపై మహారాష్ట్ర ప్రభుత్వం అక్రమంగా ప్రాజెక్టులను చేపట్టకపోతే వాటిని చూడడానికి వెళ్లిన తమ పార్టీ నాయకులను ఎందుకు అడ్డుకుంటారని ఆయన అడిగారు. తాము ప్రాజెక్టులను సందర్శించడానికి వస్తున్నట్లు తమ పార్టీ నాయకులు పోలీసులకు కూడా చెప్పారని, అయినా వారిని అడ్డగిస్తున్నారని ఆయన అన్నారు. కాంగ్రెస్ ప్రభుత్వం అన్ని వర్గాలకు నష్టం చేస్తోందని ఆయన అన్నారు. తెలంగాణ రాష్ట్ర సమితి (తెరాస) కాంగ్రెసుతో పొత్తు పెట్టుకునే దిశగా వెళ్తుందనే విషయంపై ఆయన ప్రతిస్పందించారు. వామపక్షాలతో పొత్తులు కుదిరితే ఎవరు ఎటు వెళ్లినా తమకేమీ నష్టం లేదని ఆయన అన్నారు.