ధరలపై అదుపు లేదు: చంద్రబాబు

హైదరాబాద్‌: కాంగ్రెస్‌ అధికారంలోకి వచ్చాక ధరలపై కనీస అదుపుకూడా లేదని టీడీపీ అధ్యక్షుడు చంద్రబాబునాయుడు అన్నారు. ప్రభుత్వ అవినీతి, ధరల పెరుగుదలకు వ్యతిరేకంగా టీడీపీ మహబూబ్‌నగర్‌ జిల్లా కోస్గిలో గురువారం తలపెట్టిన ధర్నాకు బయలుదేరి వెళ్తూ ఆయన మీడియా ప్రతినిధులతో మాట్లాడారు. అంతర్జాతీయ మార్కెట్‌లో ముడిచమురు ధరల తగ్గుదలకు అనుగుణంగా పెట్రోలు, డీజిలు ధరలు తగ్గించాలని ఆయన డిమాండ్‌ చేశారు.

కాంగ్రెస్ నాయకులు దళారీలుగా వ్యవహరిస్తూ ధరలను అదుపు చేయలేకపోతున్నారని ఆయన విమర్శించారు. బియ్యం ధరలు గణనీయంగా పెరిగాయని, ప్రభుత్వం ఏ మాత్రం పట్టించుకోవడం లేదని ఆయన అన్నారు. ప్రభుత్వం జలయజ్ఞం పేరుతో ధన యజ్ఞానికి పాల్పడుతోందని ఆయన వ్యాఖ్యానించారు.