వైయస్ ను దోషిగా నిలబెడ్తాం: బాబు

విశాఖపట్నం: ముఖ్యమంత్రి డాక్టర్ వైయస్ రాజశేఖర రెడ్డిని ప్రజల ముందు దోషిగా నిలబెడుతామని తెలుగుదేశం పార్టీ అధ్యక్షుడు నారా చంద్రబాబునాయుడు అన్నారు. విజయనగరం మహా ధర్నాలో పాల్గొనడానికి వచ్చిన ఆయన మంగళవారం మీడియా ప్రతినిధులతో మాట్లాడారు. కాంగ్రెస్ ప్రభుత్వం అవినీతి ముసుగును తొలగిస్తామని ఆయన అన్నారు. అభివృద్ధి ముసుగులో ప్రభుత్వం అవినీతికి పాల్పడుతోందని ఆయన విమర్శించారు. తెలుగుదేశం ప్రభుత్వ హయాంలో సంపద సృష్టిస్తే కాంగ్రెస్ ప్రభుత్వం దోచుకు తింటోందని ఆయన వ్యాఖ్యానించారు. ప్రభుత్వ అవినీతికి భయపడే వోక్స్ వ్యాగన్ పారిపోయిందని ఆయన వ్యాఖ్యానించారు.

ఆల్ ఫ్రీ బాబు అని ముఖ్యమంత్రి డాక్టర్ వైయస్ రాజశేఖర రెడ్డి అనడంపై ఆయన తీవ్రంగా ప్రతిస్పందించారు. దోపిడీని తగ్గించగలితే తాను ప్రజలకు ఇచ్చిన హామీలను అన్నింటిని అమలు చేయడం సాధ్యమేనని ఆయన అన్నారు. తమ ప్రభుత్వ హయాంలోనే విశాఖపట్నం అభివృద్ధి చెందిందని ఆయన అన్నారు. ముఖ్యమంత్రి డాక్టర్ వైయస్ రాజశేఖర రెడ్డి శాంతిభద్రతలను గాలికి వదిలేశారని, జైళ్లలో కూడా హత్యలు చేస్తున్నారని ఆయన ఆరోపించారు. వచ్చే ఎన్నికల్లో తెలుగుదేశం, వామపక్షాల కూటిమిదే విజయమని ఆయన అన్నారు. ముఖ్యమంత్రి డాక్టర్ వైయస్ రాజశేఖర రెడ్డికి వచ్చే ఎన్నికల్లో 23 శాసనసభ స్థానాలు మాత్రమే వస్తాయని ఆయన అన్నారు.