చంద్రబాబుతోనే కెసిఆర్

హైదరాబాద్: వచ్చే ఎన్నికల్లో తెలుగుదేశం పార్టీతోనే పొత్తు పెట్టుకోవాలని తెలంగాణ రాష్ట్ర సమితి (తెరాస) నిర్ణయించుకున్నట్లు తెలుస్తోంది. ప్రజాభిప్రాయ సేకరణ జరిపిన అనంతరం తెరాస అధ్యక్షుడు కె. చంద్రశేఖర రావు ఆ నిర్ణయానికి వచ్చినట్లు సమాచారం. ఒక వైపు ప్రజారాజ్యంతో, మరో వైపు తెలుగుదేశం పార్టీతో ఏక కాలంలో పొత్తుల కోసం చర్చలు జరిపిన తెరాస చివరకు తెలుగుదేశం పార్టీ వైపే మొగ్గు చూపినట్లు తెలుస్తోంది. వామపక్షాలతో ఇప్పటికే పొత్తులు ఖరారు చేసుకున్న తెలుగుదేశం పార్టీ ప్రజారాజ్యం కన్నా మెరుగ్గా ఉందని కెసిఆర్ భావిస్తున్నట్లు సమాచారం.

కెసిఆర్ రేపో, ఎల్లుండో ఢిల్లీకి వెళ్లి వచ్చిన అనంతరం ఈ నెల 21వ తేదీన తెలుగుదేశంతో పొత్తు విషయాన్ని అధికారికంగా ప్రకటించే అవకాశం ఉందని భావిస్తున్నారు. ప్రజారాజ్యం పార్టీకి తెలంగాణలో అంత ఆదరణ లేదని, పార్టీలో కూడా అసంతృప్తి నెలకొని ఉందని, ఈ స్థితిలో ప్రజారాజ్యంతో కలిసి పని చేయడం వల్ల ఉపయోగం ఉండదని కెసిఆర్ అనుకుంటున్నట్లు తెలుస్తోంది. తెలుగుదేశం, వామపక్షాల కూటమి బలంగా ఉందని, కాంగ్రెసు పార్టీని ఓడించడం ఈ కూటమి వల్లనే సాధ్యమవుతుందని ఆయన అంచనా వేస్తున్నట్లు చెబుతున్నారు. దీని వల్ల తెలుగుదేశం, వామపక్షాల కూటమి వెంట ఉండాలని ఆయన నిర్ణయించుకున్నట్లు తెలుస్తోంది.