భార్గవిది హత్యా, ఆత్మహత్యా?

హైదరాబాద్: నటి భార్గవితో కలిసి మరణించిన వ్యక్తిని ఆమె భర్త బుజ్జిగా గుర్తించారు. అతను భార్గవి మేనమామ కుమారుడు హైదరాబాదులోని బంజారాహిల్స్ లోని వెంకటేశ్వర నగరులో ఆమె తన సొంత అపార్టుమెంటులో ఉంటోంది. ఆమెతో పాటు బుజ్జి, తల్లి ఉంటున్నారు. బుజ్జితో ఆమెకు పెళ్లి నిశ్చియమైనట్లు చెబుతున్నారు. ఆమె శరీరంపై గాయాలు, రక్తం మరకలున్నాయి. దీంతో పోలీసులు హత్య కావచ్చుననే కోణంలో కూడా దర్యాప్తు చేస్తున్నారు. అయితే ఆమెకు నెల్లూరు జిల్లాకు చెందిన బుజ్జి అనే వ్యక్తితో పెళ్లయినట్లు సమాచారం. వీరిద్దరికి మధ్య నాలుగున్నరేళ్ల క్రితం పెళ్లయినట్లు, ఆమెకు ఒక కుమారుడు కూడా ఉన్నాడని తెలుస్తోంది. రెండు శవాల పక్కన విషం సీసా ఉంది.

వారిద్దరు పురుగుల మందు తాగి ఆత్మహత్య చేసుకున్నట్లు ఊహాగానాలు చెలరేగుతున్నాయి. అయితే భార్గవిని హత్య చేసి బుజ్జి ఆత్మహత్య చేసుకున్నాడా అనే అనుమానాలు వ్యక్తమవుతున్నాయి. బుజ్జి నోటి నుండి నురగలు వెలువడ్డాయి. భార్గవి సోమవారం అష్టాచెమ్మా సినిమా విజయోత్సవ సభకు హాజరు కావాల్సి ఉంది. కానీ ఆమె వెళ్లలేదు. మంగళవారం ఉదయం ఎస్ఎస్ కుమార్ దర్శకత్వంలోని సినిమా షూటింగ్ కు వెళ్లాల్సి ఉంది. తన కోసం వచ్చిన సినీ సిబ్బంది వాహనంలో ఎక్కడానికి కిందికి వచ్చిన భార్గవి నగలు మరిచిపోయానంటూ పైకి వెళ్లిందని, ఎంతకీ ఆమె తిరిగి రాకపోవడంతో సిబ్బంది పైకి వెళ్లి చూశారు. రెండు శవాలు మంచంపై పడి ఉండడంతో వారు ఎస్ఎస్ కుమార్ కు చెప్పారు.