మేటాస్‌ ఛైర్మన్‌ రాజీనామా

హైదరాబాద్‌:సత్యం సంక్షోభ ప్రభావం తీవ్రతరమవుతోంది.సర్వత్రా విమర్శలు తలెత్తుతున్న ఈ స్ధితిలో మేటాస్‌ ఇన్‌ఫ్రా ఛైర్మన్‌ ఆర్‌.సి.సిన్హా తన పదవికి రాజీనామా చేసినట్టు మేటాస్‌ తెలిపింది. ఇప్పటి వరకూ సిన్హా ఛైర్మన్‌గాను నాన్‌ ఎగ్జిక్యూటివ్‌ డైరెక్టరుగానూ విధులు నిర్వహిస్తున్నారు. డైరెక్టర్లుగా తేజరాజు, ఆర్పీ రాజు, పీకే మాధవ్‌ల, చందర్‌కుమార్‌ బన్సాల్‌లు ఉన్నారు. మేటస్‌ను సత్యం కంప్యూటర్స్‌ ప్రమోట్‌ చేస్తున్నదన్నది తెలిసిందే.

సత్యం కంప్యూటర్స్‌ పతనావస్థకు చేరిన నేపథ్యంలో మేటాస్‌ కూడా ఆర్థికంగా బలహీనపడిందని రాష్ట్రప్రభుత్వం భావిస్తోంది. మేటాస్‌కు అప్పగించిన హైదరాబాద్‌ మెట్రో రైలు, కృష్ణా జిల్లా బందరులో ఓడరేవు పథకాలను రద్దుచేసుకోవాలని యోచిస్తున్నట్లు తెలిసింది. మెట్రో రైలు ఒప్పందానికి సంబంధించి గతంలో ఢిల్లీ మెట్రో రైలు ఎండీ శ్రీధరన్‌ సంచలన వ్యాఖ్యలుచేశారు. ఎన్నికలు తరుముకొస్తున్న సమయంలో విమర్శలు మళ్లీ చెలరేగితే రాజకీయంగా దెబ్బతింటామన్నది వైఎస్‌ సర్కారు ఆందోళనగా కనిపిస్తోంది.