గాంధీజీకి ఉందా? పవన్

హైదరాబాద్: 'రాజకీయాల్లోకి రావాలనుకునే వారికి అనుభవం ఎందుకు...? గాంధీజీకి ఉందా? చిత్తశుద్ధి, సత్యం ఉండాలి. అన్యాయం, దోపిడీకి గురవుతున్న వర్గానికి అండగా ఉండగల దమ్ము, ధైర్యం ఉంటే చాలు. అవి మా నాయకుడికి మెండుగా ఉన్నాయి' అని యువరాజ్యం అధినేత పవన్‌ కళ్యాణ్‌ పేర్కొన్నారు.పార్టీ కార్యాలయంలో త్రివర్ణ పతాక ఆవిష్కరణ అనంతరం ఆయన మీడియాతో మాట్లాడారు. దేశ స్వాతంత్య్రం కోసం త్యాగాలు చేసిన సుభాష్‌ చంద్రబోస్‌ అస్తికలు టోక్యోలో ఉన్నాయని... వాటిని మన దేశానికి తీసుకువచ్చి అవి ఆ మహానుభావుడివో కావో తేల్చాలని ప్రభుత్వాన్ని డిమాండు చేసారు.

ఇక తెలంగాణపై ప్రజారాజ్యానికి స్పష్టత లేదంటూ టీఆర్‌ఎస్‌ సిద్ధాంతకర్త ప్రొఫెసర్‌ జయశంకర్‌ చేసిన వ్యాఖ్యలపై పవన్‌ తీవ్రంగా స్పందించారు. ఆ పార్టీకి స్పష్టత ఇవ్వాల్సిన అవసరం తమకు లేదని తేల్చి చెప్పారు. తమ స్పష్టతను ప్రశ్నించే ముందు టీఆర్‌ఎస్‌కు ఉన్న స్పష్టత ఏమిటో ప్రజలకు వివరించాలని డిమాండ్‌ చేశారు.అలాగే ప్రత్యేక తెలంగాణపై టీఆర్‌ఎస్‌కే స్పష్టత లేదని ఆరోపించారు. తెలంగాణ రాష్ట్ర సాధన పేరుతో నాలుగున్నరేళ్లుగా కాంగ్రెస్‌తో అధికారం పంచుకున్న టీఆర్‌ఎస్‌కు ఏం స్పష్టత ఉన్నదని ప్రశ్నించారు. తెలంగాణ సమస్యను ఆత్మగౌరవ సమస్యగా పేర్కొన్న తొలి వ్యక్తి చిరంజీవేనన్నారు.