కమ్యూనిస్టుల చెక్క భజన: పవన్

ఖమ్మం: యువరాజ్యం అధ్యక్షుడు పవన్ కల్యాణ్ కమ్యూనిస్టులకు కంచుకోట అయిన ఖమ్మం జిల్లాలో లెఫ్ట్ పార్టీలపై లెఫ్ట్ అండ్ రైట్ తీసుకున్నారు. టీడీపీ,కాంగ్రెస్‌లు ప్రజలను బిచ్చగాళ్లుగా మారుస్తుంటే సిద్థాంతాలను గాలికి వదిలి పాలకులకు చెక్కభజన చేస్తూ కమ్యూనిస్టులు కాలక్షేపం చేస్తున్నారని పవన్‌ కల్యాణ్‌ విమర్శించారు. ప్రజా అంకిత యాత్రలో భాగంగా ఆయన ఈరోజు ఉదయం సత్తుపల్లి మండలంలో పర్యటించారు.

రాష్ట్రాన్ని ఇప్పటివరకు పాలించిన పార్టీలు నిజంగా అభివృద్ధి చేసి ఉంటే ప్రజలు వారికే ఓట్లు వేస్తారనే అలాంటప్పుడు ఓ సినిమా నటుడు పార్టీ పెడితే ఎందుకు భయపడిపోతున్నారని ఆయన అన్నారు. ప్రజలకు కావలిసింది దొరల తెలంగాణా కాదని సామాజిక తెలంగాణా అని ఆయన అన్నారు. జిల్లా మంత్రి వనమా వెంకటేశ్వరరావు, ఆయన కుమారుడు ప్రజల సొమ్మును దోచుకుంటున్నారని ఆరోపించారు. ఈరోజు సాయంత్రం ఆయన ఖమ్మంలో బహిరంగసభలో పాల్గొంటారు.