సోనియా సభకు లక్షల మంది

హైదరాబాద్: కాంగ్రెస్‌ అధ్యక్షురాలు సోనియా గాంధీ నేటి సాయంతం సికింద్రాబాద్ పరేడ్ గ్రౌండ్స్ లో బహిరంగ సభలో పాల్గొనబోతున్నారు. ఆమె సభలకు కాంగ్రెస్ నాయకులు జనాన్ని లక్షల సంఖ్యలో తరలిస్తున్నారు. ఈరోజు ఆమె రాజధానిలో పలు కార్యక్రమాల్లో పాల్గొంటున్నారు. సాయంత్రం నెక్లెస్‌ రోడ్డులో ఆమె ఇందిరాగాంధీ విగ్రహావిష్కరణచేసి అనంతరం సికింద్రాబాద్‌ పరేడ్‌గ్రౌండ్స్‌లో బహిరంగసభలో పాల్గొంటారు. దీనికోసం ఉదయంనుంచే నగరవాసులకు పాట్లు మొదలయ్యాయి.

ఆర్టీసీ అధికారులు నిబంధనలకు నీళ్లు వదలి వందలాది బస్సులను సోనియా పర్యటనకు తరలించారు. దీంతో జంటనగరవాసులు తీవ్ర అసౌకర్యానికి గురయ్యారు. ఉదయం కార్యాలయాలకు వెళ్లేవారు గంటలకొద్దీ బస్టాపుల్లోనే వేచి ఉండాల్సి వచ్చింది. దీంతో ఆటోలవాళ్లు ఇష్టారాజ్యంగా అధికమొత్తంలో ఛార్జీలు వసూలుచేశారు. దీనికి తోడు సొంత వాహనాలపై వెళ్లేవారుకూడా ట్రాఫిక్‌ మళ్లింపులతో నానా పాట్లు పడ్డారు. కార్యాలయాల సమయం తరువాత ఆంక్షలు విధించి ఉండాల్సిందని, సాయంత్రం సభకు ఇప్పటినుంచే పాట్లు ఏమిటని ఉద్యోగులు వాపోయారు.