'మొద్దు లోకేష్ కు అంత సీనుందా?'

హైదరాబాద్: ఐఐటీ ప్రవేశ పరీక్ష శిక్షణా తరగతుల్లో చేర్చుకునేందుకు ప్రముఖ విద్యావేత్త చుక్కా రామయ్య తిరస్కరించిన నారా లోకేశ్‌ నాయుడును, మేధావిగా తెలుగుదేశం పార్టీనేతలు కీర్తించడాన్ని సీఎల్పీ ఎద్దేవా చేసింది. ఇటీవల తెలుగుదేశం పార్టీ ప్రకటించిన ముసాయిదా ఎన్నికల హామీలో చేర్చిన నగదు బదిలీ పథకం రూపకల్పన, ఆంతర్జాతీయంగా ఉన్న పరిచయాలతో లోకేశ్‌ చేసిన ఆలోచనేనంటూ ఆ పార్టీనేత ఉమ్మారెడ్డి వెంకటేశ్వర్లు ప్రకటించడంపై ఎమ్మెల్సీ గిడుగు రుద్రరాజు బుధవారం ఒక ప్రకటనలో విస్మయం వ్యక్తం చేశారు.

స్టాన్‌ ఫర్డ్‌ యూనివర్శిటీలో లోకేశ్‌కు ప్రతిభ ఆధారంగా సీటు రాలేదని, సత్యం అధినేత రామలింగ రాజు ఇచ్చిన డోనేషన్‌తోనే ఆ వర్శిటీలో లోకేశ్‌ చదివారన్న విమర్శలు ఉన్నాయని అన్నారు. తెలుగుదేశం నేత చెబుతున్నట్లుగానే లోకేశ్‌ ఆ పథక రచన చేస్తే, ప్రభుత్వాలు ఆర్థిక మాంద్యం ఎదుర్కొంటున్న సమయంలో ఈ పథకానికి అయ్యే రూ.36వేల కోట్లు ఎలా కేటాయిస్తారని ప్రశ్నించారు.