బాబు ఫోన్: రాఘవులు తిరస్కారం

హైదరాబాద్‌: మహాకూటమి సమావేశానికి హాజరు కాని సిపిఎం నాయకత్వాన్ని బుజ్జగించే పనిలో తెలుగుదేశం పార్టీ అధ్యక్షుడు నారా చంద్రబాబు నాయుడు పడ్డారు. మంగళవారం ఉదయం 11 గంటలకు తలపెట్టిన మహాకూటమి సమావేశం కోసం సిపిఐ నేత కె. నారాయణ, తెలంగాణ రాష్ట్ర సమితి (తెరాస) నేత కె. చంద్రశేఖరరావు చంద్రబాబు నివాసానికి వచ్చారు. దీంతో చంద్రబాబు సిపిఎం రాష్ట్ర కార్యద్శర్శి రాఘవులుకు స్వయంగా ఫోన్‌ చేశారు. అభిప్రాయబేధాలుంటే మాట్లాడి పరిష్కరించుకుందామని సమావేశానికి రావాలని కోరారు. అయితే ఆయన విజ్ఞప్తిని రాఘవులు తిరస్కరించారు. సీట్ల సంఖ్య ఖరారయ్యేంతవరకు రానని తిరస్కరించారు. తమ నాయకుడు రామ్మోహన్ ను చంద్రబాబు రాఘవులు చెంతకు పంపారు.

మహాకూటమిలో మిత్రపక్షాల మధ్య అభిప్రాయబేధాలు ఉన్నమాట నిజమేనని అయితే ఇదంతా తాత్కాలికమేనని టీడీపీ నేత కడియం శ్రీహరి వరంగల్ జిల్లాలో అన్నారు. సీట్ల సర్దుబాటు సమస్య కాబోదని త్వరలో అంతా సర్దుకుంటుందని ఆశాభావం వ్యక్తం చేశారు. మహాకూటమి విచ్ఛిన్నం కావాలని కాంగ్రెస్‌ నాయకులు ఎదురుచూస్తున్నారని, వారి ఆశ నెరవేరదనిఅన్నారు. వరంగల్‌ జిల్లా స్టేషన్‌ ఘన్‌పూర్‌ అసెంబ్లీ స్థానం నుంచి పోటీ చేస్తున్న ఆయన ఈరోజు తన ప్రచారాన్ని ప్రారంభించారు. వరంగల్‌ ఎంపీగా పోటీచేస్తున్న మహాకూటమి అభ్యర్థి పరమేశ్వర్‌తో కలిసి ప్రచారం నిర్వహించారు.