సిఇసిగా చావ్లా బాధ్యతలు

న్యూఢిల్లీ: కేంద్ర ఎన్నికల ప్రధానాధికారి (సిఇసి)గా నవీన్‌ చావ్లా మంగళవారం బాధ్యతలు స్వీకరించారు. ప్రధాన ఎన్నికల అధికారి గోపాలస్వామి పదవీకాలం ముగియటంతో ఆయన నిన్న బాధ్యతల నుంచి తప్పుకున్నారు. ఆ స్థానంలో ఇప్పటివరకు కమిషనర్‌గా ఉన్న నవీన్‌ చావ్లా బాధ్యతలు స్వీకరించారు. ఆయన 2010 జులై 29 వరకు పదవిలో ఉంటారు. మలివిడత ఎన్నికలు ఆయన పర్యవేక్షణలోనే జరుగుతాయి. ఆయన కాంగ్రెస్‌ పక్షపాతి అని నవీన్ చావ్లాను తొలగించాలని గత కమిషనర్‌ గోపాలస్వామి చేసిన విజ్ఞప్తిని ప్రభుత్వం తిరస్కరించింది.

ఒక వైపు ఎన్నికలు జరుగుతుండగా బాధ్యతలు స్వీకరించిన తొలి సిఇసి నవీన్ చావ్లానే. ఇంధన కార్యదర్శి విఎస్ సంపత్ మూడో ఎన్నికల కమీషనరుగా పదవీ బాధ్యతలు స్వీకరించారు. చావ్లా పలు పుస్తకాలు రాశారు. మదర్ థెరిసా జీవిత చరిత్రను కూడా ఆయన రాశారు. కమిషన్ లో విభేదాలు లేవని నవీన్ చావ్లా పదవీ బాధ్యతలు స్వీకరించిన అనంతరం అన్నారు. ఎన్నికలను నిష్పాక్షికంగా జరిపిస్తామని ఆయన హామీ ఇచ్చారు.