వైయస్ కు ఈసీ క్లీన్ చిట్

హైదరాబాద్: తెలంగాణ పై వైయస్ చేసిన వ్యాఖ్యల్లో అభ్యంతరకరమైనవేవీ లేవని...దీనికి సంబంధించిన వీడియో సీడీలను పరిశీలించి ఈ నిర్ణయం తీసుకున్నట్లు సీఈఓ సుబ్బారావు మీడియా సమావేశంలో తెలిపారు. ప్రత్యేక తెలంగాణ ఏర్పడితే..ఆంధ్ర, రాయలసీమ వాసులు హైదరాబాద్‌లో విదేశీయుల్లా నివసించాల్సి వస్తుందని, తెలంగాణేతరులు వ్యాపారాలను మూసివేయాల్సి వస్తుందని ఈ నెల 16న కర్నూలు జిల్లా నంద్యాలలో సీఎం చేసిన వ్యాఖ్యలు పెద్ద దుమారాన్నే రేపాయి. ఆ తర్వాత కూడా వైఎస్‌ పదేపదే ఆ వ్యాఖ్యల్ని తన ప్రసంగాల్లో ప్రస్తావించారు.

అయితే పెద్ద ఎత్తున దుమారం లేవటంతో గతంలో కెసిఆర్ అన్న మాటలను తాను గుర్తుచేశానేగాని, అవి తన సొంత వ్యాఖ్యలు కావని సమర్థించుకున్నారు. దీనిపై విపక్షాలు, తెలంగాణ ప్రజాసంఘాలు తీవ్రంగా స్పందించాయి. ప్రాంతీయ విద్వేషాల్ని రెచ్చగొట్టేలా సీఎం ప్రసంగించారంటూ దుయ్యబట్టాయి. దాంతో వారు ఎన్నికల సంఘానికి వినతిపత్రాలు అందజేశాయి. దీనిపై స్పందించిన ఈసీ నంద్యాలలో సీఎం మాట్లాడిన వీడియో సీడీని క్షుణ్ణంగా పరిశీలించింది. సీఎం ప్రసంగంలో అభ్యంతరకరమైన వ్యాఖ్యలేవీ లేవని తేల్చింది.