అంతా దుష్ప్రచారం: రోశయ్య

హైదరాబాద్: సచివాలయంలోని డి- బ్లాకులో జరిగిన అగ్ని ప్రమాదంలో ముఖ్యమైన ఫైళ్లన్నీ దగ్ధమయ్యాయని ప్రతిపక్షాలు దుష్ప్రచారం చేస్తున్నాయని రాష్ట్ర ఆర్థిక మంత్రి కె.రోశయ్య తప్పు పట్టారు. ముఖ్యమైన ఫైళ్లన్నీ భద్రంగా ఉన్నాయని ఆయన శుక్రవారం మీడియా ప్రతినిధుల సమావేశంలో చెప్పారు. అగ్ని ప్రమాదం వల్ల సంబంధిత కార్యాలయంలో టెలిఫోన్ లైన్లు పని చేయడం లేదని ఆయన చెప్పారు. కావాలని చేస్తే ఏదో ఒక సాక్ష్యం దొరుకుతుంది కదా అని ఆయన అన్నారు. ఫైళ్లను కనుమరుగు చేసేందుకు ప్రభుత్వం అగ్ని ప్రమాదం కుట్ర చేసిందని ప్రతిపక్షాలు చేస్తున్న విమర్శల్లో ఏ మాత్రం నిజం లేదని ఆయన అన్నారు.

ఆర్థిక శాఖ ఫైళ్లన్నీ భద్రంగా ఉన్నాయని ఆర్థిక శాఖ ముఖ్య కార్యదర్శి కృష్ణారావు చెప్పారు. అగ్ని ప్రమాదం వల్ల ఎలాంటి నష్టం వాటిల్లలేదని, నెట్ వర్కు మాత్రమే కాలిపోయిందని ఆయన అన్నారు. డి- బ్లాకులో కాలిపోయిన సర్వర్లలోని సమాచారం బ్యాకప్ ఫైళ్లలో భద్రంగా ఉందని ఐటి ప్రధాన కార్యదర్శి సురేష్ స్పష్టం చేశారు. సచివాలయంలో 50 సర్వర్లున్నాయని ఆయన చెప్పారు. సోమవారానికల్లా నెట్ వర్కును పునరుద్ధరిస్తామని ఆనయ చెప్పారు.