ప్రధాని అభ్యర్థిగా చెప్పుకోలేదు: మోడీ

అహ్మదాబాద్: భారతీయ జనతా పార్టీ (బిజెపి) భవిష్యత్తు ప్రధాని అభ్యర్థిగా తనను తాను ఎప్పుడూ ప్రకటించుకోలేదని గుజరాత్ ముఖ్యమంత్రి నరేంద్ర మోడీ అన్నారు. తాను గుజరాత్ కు చెందినవాడినని, గుజరాత్ రాష్ట్రం కోసం పనిచేస్తానని, ఈ విషయంలో తన వైఖరి స్పష్టంగా ఉందని ఆయన మీడియా ప్రతినిధులతో అన్నారు. మోడీని భవిష్యత్తు ప్రధానిగా ప్రకటించడం వల్లనే ఎన్డీయె నష్టపోయిందని జెడియు నేత శరద్ యాదవ్ అనడంపై ఆయన ఆ వివరణ ఇచ్చారు. మీడియానే తనను ప్రధాని అభ్యర్థిగా చూపించిందని ఆయన అన్నారు.

ప్రజా తీర్పును గౌరవించి తాము ప్రతిపక్షంలో కూర్చుంటామని ఆయన చెప్పారు. ప్రజాస్వామ్యంలో ప్రజా తీర్పే అంతిమమని ఆయన అన్నారు. రాజకీయాలకు పుల్ స్టాప్ ఉండనది, రాష్ట్రం అభివృద్ధి పథంలో పయనిస్తుందని ఆయన చెప్పారు. యుపిఎ ప్రభుత్వం అభివృద్ధి పథంలో దేశాన్ని నడిపించాలని తాను కోరుకుంటున్నట్లు ఆయన తెలిపారు.