క్షమాభిక్షపై సిఎంతో చర్చలు: సబిత

హైదరాబాద్‌: ఖైదీలకు క్షమాభిక్ష పెట్టే విషయంపై ముఖ్యమంత్రి డాక్టర్ వైయస్ రాజశేఖర రెడ్డితో చర్చిస్తున్నట్లు రాష్ట్ర హోం మంత్రి సబితా ఇంద్రారెడ్డి చెప్పారు. హైదరాబాద్‌ లోని చంచల్‌ గూడ జైలును ఆమె శనివారం సందర్శించారు. హోంమంత్రిగా బాధ్యతలు చేపట్టిన ఆమె తొలిసారిగా జైలులోని మహిళాకారాగాన్ని సందర్శించి వాళ్ళ సమస్యలను అడిగి తెలుసుకున్నారు. వసతులు సరిగా లేవని కొంత మంది ఖైదీలు ఫిర్యాదు చేశారు. దేశంలోని ఏ జైలులోనూ లేని వసతులు మన రాష్ట్ర జైళ్లలో ఉన్నాయని ఆమె చెప్పారు.

రాష్ట్రంలోని జైళ్ళలో పని తీరును సమీక్షించి అన్ని సౌకర్యాలు కల్పిస్తామని ఆమె అనంతరం మీడియా ప్రతినిధులతో అన్నారు. తర్వాత చిన్న పిల్లలు ఆరేళ్ళ వరకు తల్లుల వద్దే ఉంచి వారికి విద్యాభ్యాసం కూడా ప్రభుత్వమే కల్పిస్తుందని, దేశంలో ఏ రాష్ట్రంలోనూ ఈ పద్ధతి లేదని, ఒక్క ఆంధ్రరాష్ట్రంలోనే అమలు చేస్తున్నట్లు హోంమంత్రి తెలిపారు.