తెలంగాణపై వైయస్ మాట ఓకే: గీతారెడ్డి

హైదరాబాద్: తెలంగాణపై ముఖ్యమంత్రి డాక్టర్ వైయస్ రాజశేఖర రెడ్డి మాటలకు, వైఖరికి మంత్రి వర్గ సభ్యుల మద్దతు లభించింది. తెలంగాణపై చేసిన ప్రకటనకు వైయస్ రాజశేఖర రెడ్డిని తెలంగాణ మంత్రులు అభినందించినట్లు సమాచార శాఖ మంత్రి జె.గీతారెడ్డి చెప్పారు. ముఖ్యమంత్రి డాక్టర్ వైయస్ రాజశేఖర రెడ్డి అధ్యక్షతన గురువారం మంత్రివర్గ సమావేశం జరిగింది. ముఖ్యమంత్రి తెలంగాణపై తీసుకున్న వైఖరికి తాము కట్టుబడి ఉంటామని మంత్రులు చెప్పినట్లు ఆమె తెలిపారు. మంత్రి వర్గ సమావేశ వివరాలను ఆమె మీడియా ప్రతినిధులకు వివరించారు.

తెలంగాణ రాష్ట్ర ఏర్పాటు తెలంగాణ రాష్ట్ర సమితి (తెరాస) వల్ల సాధ్యం కాదనే సత్యాన్ని తెలంగాణ ప్రజలు గుర్తించారని, తెలంగాణను కాంగ్రెసు అభివృద్ధి చేస్తుందని నమ్మారని, తెలంగాణ కాంగ్రెసు వల్లనే సాధ్యమవుతుందని విశ్వసించారని ఆమె అన్నారు. సాగునీటి ప్రాజెక్టల్లో తెలంగాణకే ప్రభుత్వం అధిక ప్రాధాన్యం ఇచ్చిందని ఆమె చెప్పారు. ప్రాణహిత - చేవెళ్ల వంటి భారీ ఎత్తిపోతల పథకాన్ని ప్రభుత్వం చేపడుతోందని ఆమె చెప్పారు. ప్రజలు తెరాస అధ్యక్షుడు కెసిఆర్ ను, తెరాసను నమ్మలేదని ఎన్నికల ద్వారా తేలిపోయిందని ఆమె అన్నారు. తెలంగాణ రాష్ట్ర ఏర్పడుతుందని ఆమె ఒక ప్రశ్నకు సమాధానంగా చెప్పారు. ఎప్పుడు తెలంగాణ రాష్ట్ర ఏర్పాటుకు చర్యలు తీసుకుంటారని అడిగితే రాజకీయ చర్చలకు మళ్లిస్తున్నారని ఆమె సమాధానం దాటవేశారు.