పార్లమెంటు వద్ద టిడిపి ఎంపీల ధర్నా

న్యూఢిల్లీ‌: బాబ్లీ ప్రాజెక్టు వివాదంలో జోక్యం చేసుకోవాలని డిమాండ్ చేస్తూ తెలుగుదేశం పార్టీ పార్లమెంటు సభ్యులు గురువారం పార్లమెంటు ముందు ధర్నా చేశారు. బాబ్లీతో పాటు మహారాష్ట్ర ప్రభుత్వం గోదావరి నదిపై అక్రమంగా నిర్మిస్తున్న ప్రాజెక్టులను అడ్డుకోవాలని వారు కేంద్ర ప్రభుత్వాన్ని డిమాండ్ చేశారు. రాష్ట్ర ప్రభుత్వం నిర్లక్ష్యం వల్ల, కేంద్ర ప్రభుత్వం పట్టించుకోకపోవడం వల్ల మహారాష్ట్ర ప్రభుత్వం అక్రమంగా ప్రాజెక్టులు నిర్మిస్తోందని తెలుగుదేశం పార్లమెంటు సభ్యుడు నామా నాగేశ్వరరావు విమర్శించారు.

మహారాష్ట్ర ప్రభుత్వాన్ని అక్రమ ప్రాజెక్టుల నిర్మాణం నుంచి నిరోధించడానికి జోక్యం చేసుకోవాలని తెలుగుదేశం పార్టీ పార్లమెంటు సభ్యులు కేంద్రాన్ని కోరారు. రాష్ట్రానికి న్యాయం చేయాలని వారు కోరారు. కాగా, బాబ్లీ వివాదంపై రాష్ట్ర ప్రయోజనాలను కాపాడేందుకు అన్ని పార్టీల నేతలతో ప్రధాని డాక్టర్ మన్మోహన్ సింగ్ ను కలవడానికి రాష్ట్ర ప్రభుత్వం సన్నాహాలు చేస్తోంది.